ప్రియుడితోనే మూడు ముళ్లు.. 12 ఏళ్ల ప్రేమను గెలిపించుకున్న పాయల్
దిశ, సినిమా : ప్రముఖ హిందీ నటి, రియాలిటీ షో ఫేమ్ పాయల్ రోహత్గి ఎట్టకేలకు మూడుముళ్లు వేయించుకుంది. మోడల్‌గా కెరీర్ ప్రారంభించిన ఆమె.. 'బిగ్‌బాస్‌, లాక్‌అప్' షోస్‌లో అసాధారణ ప్రదర్శన ద్వారా ఎంతోమంది అభిమానులను సొంతం చేసుకోవడం తెలిసిందే. కాగా పాయల్ 12 ఏళ్లుగా ప్రముఖ రెజ్లర్ సంగ్రామ్ సింగ్‌తో డేటింగ్ చేస్తుండగా 2014లో వీరిద్దరికి నిశ్చితార్థం కూడా జరిగింది. ఆ తర్వాత పెళ్లికి సంబంధించి అనేక వార్తలు వినిపించినప్పటికీ ఈ జంట నుంచి ఎలాంటి స్పందన లేకపోవడం నెటిజన్లను ఆశ్చర్యానికి గురిచేసింది.
ఏదేమైనా మొత్తానికి జులై 9న ఆగ్రాలో కుటుంబ సభ్యులు, సన్నిహితులు, బంధువుల సాక్షిగా మూడు ముళ్ల బంధంతో ఒక్కటైంది ఈ జంట. ఇందులో భాగంగానే కొత్త జీవితాన్ని ప్రారంభించేముందు 850 ఏళ్ల చరిత్ర గల ఓ దేవాలయంలో పూజలు చేయడం విశేషం. ప్రస్తుతం పెళ్లికి సంబంధించిన ఫొటోలు సోషల్ మీడియాలో చక్కర్లు కొడుతుండగా.. ఇద్దరు కూడా సాంప్రదాయ దుస్తుల్లో చూడముచ్చటగా కనిపిస్తున్నారు.
