ప్రారంభోత్సవానికి సిద్ధమైన నూతన కార్పొరేషన్ కార్యాలయం..
దిశ, ఖమ్మం: ఖమ్మం నగర ప్రజలకు మరింత మెరుగైన పౌర సేవలు అందించేందుకు రూ.21 కోట్ల వ్యయంతో అత్యాధునిక హంగులతో నిర్మిస్తున్న ఖమ్మం నగరపాలక సంస్థ కార్యాలయ భవనం ప్రారంభోత్సవానికి సిద్దమైంది. ఖమ్మం నగరాభివృద్ధిలో భాగంగా నగర ప్రజలకు పౌర సేవలు చేరువ చేయాలనే సంకల్పంతో మంత్రి పువ్వాడ అజయ్ కుమార్ కృషి మేరకు ఖమ్మం గట్టయ్య సెంటర్లో నిర్మిస్తున్న నూతన మున్సిపల్ భవనంను అసెంబ్లీ సమావేశాల అనంతరం మంత్రి కేటీఆర్ చేతుల మీదుగా లాంఛనంగా ప్రారంభించనున్నారని మంత్రి పువ్వాడ అజయ్ కుమార్ పేర్కొన్నారు. తుది దశకు చేరుకున్న భవన నిర్మాణ పనులు ఆదివారం మంత్రి పువ్వాడ పరిశీలించారు. అత్యాధునిక మౌలిక సదుపాయాల కల్పన దిశగా నిర్మాణం శరవేగంగా పూర్తి చేయాలని అధికారులను ఆదేశించారు. ప్రత్యేక డిజైన్‌తో ఉద్యోగులు, ప్రజలకు అత్యంత సౌకర్యవంతంగా ఉండేలా తీర్చిదిద్దుతున్నామన్నారు.
సుమారు 60 వేల చదరపు అడుగుల విస్తీర్ణంలో సువిశాల ప్రాంగణంలో నిర్మిస్తున్న కార్యాలయం నిర్మాణ పనులు మరింత వేగం పెంచాలని అధికారులను ఆదేశించారు. రిసెప్షన్ కౌంటర్, ఇంజనీరింగ్, మీ సేవ, టౌన్ ప్లానింగ్, శానిటేషన్, ప్రహరీ, పార్కింగ్, గ్రీనరీ, టైల్స్, తాగునీటి వసతి, వెయిటింగ్ హాల్, ప్రజల వసతులు తదితర పనులు వివరాలను అధికారులను అడిగి తెలుసుకున్నారు. కౌన్సిల్ సమావేశాల నిమిత్తం 150 మంది కూర్చునేందుకు విశాలమైన పెద్ద హల్, డ్యుయల్ కుషన్ సీటింగ్, అధునాతన సౌండ్ సిస్టమ్, సెంట్రల్ ఏసీ తదితర సౌకర్యాలతో ఏర్పాటు చేసినట్లు తెలిపారు. గ్రేటర్‌ హైద్రాబాద్ తరహాలో కార్పొరేషన్ కార్యాలయ భవనం నిర్మిస్తున్నట్లు మంత్రి వెల్లడించారు. మంత్రి వెంట మేయర్ పునుకొల్లు నీరజ, కలెక్టర్ వీపీ గౌతమ్, మున్సిపల్ కమిషనర్ ఆదర్శ్ సురభి, డీసీసీబీ చైర్మన్ కూరాకుల నాగభూషణం, మార్కెట్ కమిటీ చైర్మన్ లక్ష్మి ప్రసన్న, మున్సిపల్ అధికారులు, సిబ్బంది, కార్పొరేటర్లు ఉన్నారు.
