హోంవర్క్ చేయలేదని విద్యార్థిని కొట్టిన ఉపాధ్యాయుడు

దిశ, దమ్మపేట : హోంవర్క్ చేయలేదని ఓ విద్యార్థిని ఉపాధ్యాయుడు చితకబాదిన ఘటన భద్రాద్రి కొత్తగూడెం జిల్లా దమ్మపేట మండలం గండగులపల్లి జిల్లా పరిషత్ ఉన్నత పాఠశాలలో చోటు చేసుకుంది. విద్యార్థి తల్లిదండ్రులు తెలిపిన వివరాల ప్రకారం గండుగులపల్లి గ్రామానికి చెందిన రోహిత్ అనే పదో తరగతి విద్యార్థిని ఆ పాఠశాలలో విధులు నిర్వర్తించే మారయ్య అనే ఉపాధ్యాయుడు హోమ్ వర్క్ చేయలేదనే కారణంతో చితకబాదాడు.

దాంతో విద్యార్థి రోహిత్ చెవికి బలమైన గాయం కావడంతో రక్తస్రావం అయింది. ఈ విషయాన్ని విద్యార్థి తన తల్లిదండ్రులకు చెప్పుకోవడంతో సోమవారం తల్లిదండ్రులు గండుగుల్లపల్లి జిల్లా పరిషత్ ఉన్నత పాఠశాల వద్ద ఆందోళనకు దిగారు. వెంటనే ఉపాధ్యాయుడిని సస్పెండ్ చేయాలని డిమాండ్ చేశారు.