తెలంగాణ ఎన్నికలు: పార్టీల ప్రతినిధులతో ఈసీ కీలక భేటీ

దిశ, వెబ్‌డెస్క్: తెలంగాణ ఎన్నికల నిర్వహణకు ఎన్నికల కమిషన్ ఏర్పాట్లు చేస్తోంది. ప్రస్తుతం ఎన్నికల కోడ్ అమల్లోకి రాగా.. దీనిని సమర్థవంతంగా అమలు చేయడంపై దృష్టి పెట్టింది. ఎన్నికల కోడ్ ఎవరూ ఉల్లంఘించకుండా చర్యలు చేపడుతోంది. నిబంధనలు అతిక్రమిస్తే చర్యలు తీసుకుంటామని హెచ్చరిస్తోంది. నవంబర్ 3న ఎన్నికల నోటిఫికేషన్ విడుదల కానుండగా.. ఆ రోజు నుంచే నామనేషన్లను స్వీకరించనుంది. ఈ క్రమంలో మంగళవారం వివిధ పార్టీల ప్రతినిధులతో ఈసీ భేటీ అయింది.

రాష్ట్ర ఎన్నికల ప్రధానాధికారి వికాస్ రాజ్ ఆధ్వర్యంలో పార్టీల ప్రతినిధులతో సమావేశం జరిగింది. ప్రశాంతంగా ఎన్నికలు నిర్వహించడం, కోడ్ అమలు, నామినేషన్లు స్వీకరణతో పాటు ఇతర అంశాలపై చర్చిస్తున్నట్లు తెలుస్తోంది. ఎన్నికల కోడ్‌, ప్రచారంపై పలు జాగ్రత్తలు చెబుతున్నట్లు సమాచారం. ఎన్నికల ప్రచారంలో పాటించాల్సిన నిబంధనలపై పలు సూచనలు చేస్తున్నట్లు తెలుస్తోంది. ఈ సమావేశంలో అన్ని పార్టీల ప్రతినిధులు పాల్గొన్నారు.