తెలంగాణలో టీడీపీ పోటీపై వైసీపీ ఎంపీ విజయసాయిరెడ్డి సెటైర్లు

దిశ, వెబ్‌డెస్క్: తెలంగాణ ఎన్నికల్లో పోటీపై టీటీడీపీ దృష్టి పెట్టింది. 119 స్థానాల్లో పోటీ చేయనున్నట్లు గతంలో ప్రకటించగా.. ఇప్పుడు టీడీపీ ప్లాన్ మార్చుకుంది. 87 స్థానాల్లో పోటీ చేసేందుకు సిద్దమవుతోంది. ఇప్పటికే ఈ స్థానాల్లో అభ్యర్థుల కసరత్తు కూడా దాదాపు పూర్తయింది. ఇటీవల రాజమండ్రి సెంట్రల్ జైల్లో చంద్రబాబుతో టీటీడీపీ అధ్యక్షుడు కాసాని జ్ఞానేశ్వర్ ములాఖత్ అయ్యారు. ఈ సందర్భంగా తెలంగాణ ఎన్నికల్లో పోటీ, అభ్యర్థుల ఖరారుపై చర్చించారు.

త్వరలో 87 స్థానాలకు అభ్యర్థులను ప్రకటించేందుకు టీడీపీ సిద్దమవుతుండగా.. దీనిపై ట్విట్టర్‌లో వైసీపీ ఎంపీ విజయసాయిరెడ్డి వ్యంగ్యస్త్రాలు సంధించారు. అన్ని స్థానాల్లో పోటీ చేసేందుకు టీటీడీపీకి అభ్యర్థులు దొరడం లేదని సెటైర్లు పేల్చారు. ఇక ఏపీలో పచ్చ పార్టీ పరిస్థితి దారుణంగా ఉందని ఆరోపించారు.

కాగా తెలంగాణ ఎన్నికల్లో ఖచ్చితంగా పోటీలోకి దిగుతామని కాసాని వెల్లడించారు. రాష్ట్రంలో బాలయ్య ఎన్నికల ప్రచారం నిర్వహిస్తారని అన్నారు. త్వరలోనే 87 మంది అభ్యర్థుల జాబితాతో పాటు మేనిఫెస్టోను కూడా విడుదల చేస్తామని తెలిపారు. తెలంగాణలో టీడీపీ బలంగా ఉందని, సత్తా చాటుతామని స్పష్టం చేశారు.