ఈనెల 30న బీజేపీ మండల కమిటీ ఎన్నికపై వర్క్ షాప్

దిశ, తెలంగాణ బ్యూరో : సంస్థాగత ఎన్నికలపై కమలం పార్టీ ఫోకస్ పెడుతోంది. దీనికి సంబంధించిన ప్రక్రియ సోమవారంతో షురూ అయింది. అందుకు గాను బూత్ కమిటీలపై కసరత్తు తో పాటు క్రియాశీల సభ్యత్వ నమోదుపై దృష్టి సారిస్తోంది. అందులో భాగంగా ఈనెల 30వ తేదీన బీజేపీ మండల కమిటీల ఎన్నికలపై వర్క్ షాప్ నిర్వహించనుంది. నాంపల్లి బీజేపీ రాష్ట్ర కార్యాలయంలో ఈ సమావేశాన్ని నిర్వహించనున్నారు. ఈ కార్యక్రమానికి ముఖ్య అతిథులుగా అభయ్ పటేల్, సునీల్ బన్సల్ హాజరవ్వనున్నారు. మండల కమిటీల ఎన్నికలపై నేతలకు వారు దిశానిర్దేశం చేయనున్నారు. ఇదిలా ఉండగా సభ్యత్వ నమోదు ప్రక్రియలో టాప్ ప్లేస్ లో కరీంనగర్ నిలిచినట్లు విశ్వసనీయ సమాచారం. మెంబర్ షిప్ డ్రైవ్ ప్రక్రియ గడువు సోమవారంతో ముగియాల్సి ఉంది. కానీ మళ్లీ పొడిగించారు. రాష్ట్ర నాయకత్వం వారికి ఇచ్చిన 50 లక్షల టార్గెట్ ను రీచ్ అవ్వాలని పార్టీ భావిస్తోంది.