ఉరి వేసుకుని పాస్టర్ మృతి

దిశ, నెక్కొండ: మండల కేంద్రంలోని సీఎస్ఐ చర్చి పాస్టర్ రెవగుళ్ల తిమోతి(52) తన ఇంటిలో ఉరి వేసుకుని ఆత్మహత్య చేసుకున్నాడు. స్థానికుల కథనం ప్రకారం జమ్మికుంట ప్రాంతం నుండి రెండు సంవత్సరాల క్రితం వచ్చి పాస్టర్ గా సీఎస్ఐ చర్చిలో పనిచేస్తున్నాడు. చర్చికి సంబంధించిన ఆర్థికలావాదేవీలు, కొంతమంది వేధింపుల వల్ల శుక్రవారం చర్చి నుండి వెళ్లిన పాస్టర్ లుంగితో ఉరివేసుకుని మృతిచెందినట్లు సమాచారం. స్థానికుల ద్వారా సమాచారం అందుకున్న ఎస్సై సీమా ఫర్హీన్ సంఘటనా స్థలానికి చేరుకుని మృతదేహాన్ని నర్సంపేట ఏరియా ఆసుపత్రికి తరలించారు. ఎస్సైని ఘటనకు సంబంధించిన వివరాలు అడుగగా బాధిత కుటుంబ సభ్యుల నుండి ఫిర్యాదు అందలేదని తెలిపారు. మృతునికి భార్య, ఇద్దరు కుమారులు ఉన్నారు.