రేపు వ‌రంగ‌ల్‌కు సీఎం…

దిశ‌, వ‌రంగ‌ల్ బ్యూరో: ముఖ్య‌మంత్రి రేవంత్‌రెడ్డి ఆదివారం వ‌రంగ‌ల్‌లో ప‌ర్య‌టించ‌నున్నారు. రాష్ట్ర సీడ్స్ అండ్‌ ఆయిల్ ఫెడ్ ఫెడ‌రేష‌న్ చైర్మ‌న్ జంగా రాఘ‌వ‌రెడ్డి కూతురు నిఖిత రెడ్డి, అవినాష్ రెడ్డిల‌కు ఆదివారం వివాహం జ‌ర‌గనుంది. ఈ వివాహానికి ముఖ్య‌మంత్రి రేవంత్ రెడ్డి హాజ‌రుకానున్నారు. ఆయ‌న‌తో పాటు డిప్యూటీ సీఎం భ‌ట్టి విక్రమార్క‌, మంత్రులు ఉత్త‌మ్ కుమార్ రెడ్డి, పొంగులేటితో పాటు ప‌లువురు కీల‌క మంత్రులు, ఎమ్మెల్యేలు, మాజీ ఎమ్మెల్యేలు ఈ వివాహ విందుకు హాజ‌రుకానున్నారు. అటు బీఆర్ ఎస్ నేత‌ల‌కు కూడా ఆహ్వానాలు అంద‌డంతో కీల‌క నేత‌లు, మాజీ మంత్రులు, ఆ పార్టీకి చెందిన ప‌లువురు మాజీ ఎమ్మెల్యేలు హాజ‌ర‌య్యే అవ‌కాశం ఉంది. షెడ్యూల్ ప్ర‌కారం.. ముఖ్య‌మంత్రి రేవంత్‌రెడ్డి ఆదివారం ఉద‌యం 9:30గంట‌ల‌కు బేగంపేట నుంచి ప్ర‌త్యేక హెలికాప్ట‌ర్‌లో బ‌య‌ల్దేరి..10:15గంట‌ల‌కు హ‌న్మ‌కొండ‌కు చేరుకుంటారు. అక్క‌డి నుంచి రోడ్డు మార్గంలో కాజీపేట మండ‌లం మ‌డికొండ‌లోని స‌త్య‌సాయి గార్డెన్‌లో జ‌రిగే వివాహ వేడుక‌కు హాజ‌ర‌వుతారు. 10:25 గంట‌ల నుంచి 11:35గంట‌ల వ‌ర‌కు వివాహ కార్య‌క్ర‌మంలోనే ఉంటారు. అనంత‌రం హ‌న్మ‌కొండ‌లోని హెలిప్యాడ్ వ‌ద్ద‌కు చేరుకుని 11:45కు ఇక్క‌డి నుంచి బ‌య‌ల్దేరి 12:20 బేగంపేట‌కు చేరుకుంటారు.