స్కూటీలో నుంచి త్రాచు పాము శబ్ధాలు.. ఏంటా అని చూడగా..

దిశ,మోత్కూరు: స్కూటీలో త్రాచు పాము దూరి హల్చల్ చేసిన సంఘటన మున్సిపల్ కేంద్రంలో ఆదివారం సాయంత్రం చోటు చేసుకుంది. స్థానికంగా మీ సేవ నిర్వహిస్తున్న బోయిని యాకయ్య తన స్కూటీని ఇంటి ముందు పార్క్ చేసి..ఇంట్లోకి వెళ్ళాడు. ఇంతలో ఎక్కడి నుండి వచ్చిందో ఏమో గానీ ఓ త్రాచు పాము స్కూటీలోకి దూరింది. కాసేపటి తర్వాత ఇంటి లో నుంచి బయటికి వచ్చిన యాకయ్య స్కూటీ ని స్టార్ట్ చేయబోగా అందులో నుండి పాము బుసలు కొడుతూ కనిపించింది. దీంతో భయానికి లోనై స్కూటీ ని వదిలేసి పక్కకు వచ్చాడు. విషయం తెలుసుకున్న స్థానికులు యువకులు ఆ స్కూటీని మున్సిపల్ కార్యాలయం ఆవరణలోకి తీసుకొని వెళ్లారు. పాము స్కూటీలోకి వెళ్లి బయటకు రాకుండా అందులోనే చిక్కుంది. తీయడానికి ప్రయత్నం చేసిన బెడిసికొట్టింది. చివరికి యువకులంతా కలిసి పాముని స్కూటీ లొనే చంపి బయటికి తీశారు. దీంతో అందరూ ఊపిరి పీల్చుకున్నారు.