అభివృద్ధి చేశాను.. మళ్లీ అవకాశం ఇవ్వాలి : కూసుకుంట్ల ప్రభాకర్ రెడ్డి

దిశ, మర్రిగూడ : ముఖ్యమంత్రి కేసీఆర్ ఆశీర్వాదంతో మర్రిగూడ మండలంలో అనేక అభివృద్ధి పనులు చేశానని ఇంకా చేయాల్సి ఉందని తనకు మరొక సారి అవకాశం కల్పిస్తే మళ్లీ అభివృద్ధి పనులు పరుగులు పెట్టిస్తానని మునుగోడు నియోజకవర్గ బీఆర్ఎస్ ఎమ్మెల్యే అభ్యర్థి కూసుకుంట్ల ప్రభాకర్ రెడ్డి ఓటర్లను అభ్యర్థించారు. ఆదివారం మండలంలోని తిరగండ్లపల్లి, తమ్మడపల్లి, అజిలాపురం, ఎర్రగండ్లపల్లి, రామ్ రెడ్డిపల్లి గ్రామాలలో ఆయన ఎన్నికల ప్రచారం నిర్వహించారు.

ఈ సందర్భంగా ఆయా గ్రామాలలో ఆయన మాట్లాడుతూ 10 ఏళ్ల కాలంలో ఎంతో అభివృద్ధి చేశామని పేర్కొన్నారు. ప్రతిగ్రామంలో సీసీ రోడ్లు అండర్ డ్రైనేజీ పనులు నిర్మించినట్లు తెలిపారు. ఎన్నికల కోడ్ అమలులో ఉన్నప్పటికీ రైతుల కోసం రేపటి నుండి రైతు బంధు వారి ఖాతాల్లో ముఖ్యమంత్రి జమ చేస్తున్నాడని తెలిపారు. ఎన్నికల్లో కాంట్రాక్టు రాజకీయ నాయకులకు తగిన బుద్ధి చెప్పి మునుగోడు ఆత్మగౌరవాన్ని కాపాడాలని ఆయన ప్రజలకు విజ్ఞప్తి చేశారు. ఈ కార్యక్రమంలో ఆ పార్టీ సీనియర్ నాయకులు మునగాల నారాయణరావు, మునగాల వెంకటేశ్వరరావు, గండికోట రాజమణి హరికృష్ణ, ఆయిలి లక్ష్మీనరసింహ ఆయాగ్రామాల్లో నాయకులు కార్యకర్తలు పాల్గొన్నారు.