ప్రారంభానికి నోచుకోని భోజనశాల..

దిశ,వర్గల్: సిద్దిపేట జిల్లా వర్గల్ మండల కేంద్రం విన్నూత్నంగా తయారవుతున్నది. పలు మండలాల్లో భవనాలు లేక ఇబ్బందులు ఎదుర్కొంటున్నారు. కానీ వర్గల్ మండలంలోని లక్షల రూపాయలతో నిర్మించిన భవనాలు మాత్రం ప్రారంభించడానికి నోచుకోవడం లేదు. గ్రంధాలయం, పాఠశాల భవనం, మహిళ సమాఖ్య భవనం, ఇప్పుడు భోజనశాల ఇలా ప్రభుత్వం మారినా అభివృద్ధి మాత్రం నోచుకోవడం లేదు.

సిద్దిపేట జిల్లా వర్గల్ మండల కేంద్రంలోని జిల్లా పరిషత్ ఉన్నత పాఠశాలలో సుమారు 500 మంది చిన్నారులు విద్యనభ్యసిస్తున్నారు. 'మన ఊరు మన బడి 'పథకంలో భాగంగా పాఠశాల అభివృద్ధికి గత ప్రభుత్వం రూ.70 లక్షలు మంజూరు చేసింది. ఇక్కడ భోజనశాల పనులు ప్రారంభించిన గుత్తేదారు నిధులు రాక మధ్యలోనే వదిలేయడంతో విద్యార్థులు మధ్యాహ్న వేళ నేలపై, చెట్ల కింద కూర్చొని తింటున్నారు. ఆగిన భోజనశాల పనులు పూర్తిచేసేలా అధికారులు చర్యలు తీసుకోవాలని విద్యార్థుల తల్లిదండ్రులు, ఉపాధ్యాయులు కోరుతున్నారు.