డబుల్ ఇస్మార్ట్ పాటలో కేసీఆర్ మాట!.. డైరెక్టర్ పూరిపై ఫ్యాన్స్ ఫైర్

దిశ, డైనమిక్ బ్యూరో: ఎంత కండకావరం పూరి జగన్నాథ్. కల్లు కంపౌండ్ పాటలో కేసీఆర్ మాటలు పెడతావా అని కేసీఆర్ అభిమానులు ఫైర్ అవుతున్నారు. ఆ పాటలోని కేసీఆర్ మాటలను వెంటనే తొలగించాలని డిమాండ్ చేస్తున్నారు. స్టార్ డైరెక్టర్ పూరి జగన్నాధ్ దర్శకత్వంలో రామ్ పోతినేని హీరోగా డబుల్ ఇస్మార్ట్ అనే సినిమా తెరకెక్కుతున్న విషయం తెలిసిందే. ఈ సినిమాలో ఇటీవలే మరో సాంగ్ ని రిలీజ్ చేశారు. రెండు రోజుల క్రితం విడుదల చేసిన "మార్ ముంత చోడ్ చింత" అనే పాటలో మాజీ సీఎం కేసీఆర్ గతంలో ఓ ప్రెస్ మీట్ లో మాట్లాడిన "ఏం జేద్దామంటవ్ మరి?" అనే హుక్ లైన్ వాడారు.

దీనిపై కేసీఆర్ అభిమానుల నుంచి అభ్యంతరాలు వెళ్లువెత్తుతున్నాయి. ఈ పాట కేసీఆర్ ని కించపరిచేలా ఉందని ఆయన అభిమానులు ఆగ్రహం వ్యక్తం చేస్తున్నారు. తెలంగాణ రాష్ట్ర సాధకుడు, మాజీ సీఎం మాటలను కల్లు కంపౌండ్ వద్ద చిత్రీకరించిన పాటలో వాడటం ఏంటని ఫ్యాన్స్ మండిపడుతున్నారు. మద్యం బాటిళ్లతో ఆడే పాటలో కేసీఆర్ పదాలు ఉపయోగించడం వెనుక ఉన్న ఉద్దేశం ఏంటో పూరి చెప్పాలంటున్నారు. అంతేగాక ఈ పాటలో తెలంగాణ సంస్కృతిని తాడుగు కల్చర్ గా చూపించే ప్రయత్నం చేశారని, పాటలోని కేసీఆర్ మాటలను వెంటనే తొలగించాలని డిమాండ్ చేస్తున్నారు.

దీనిపై ఓ కేసీఆర్ అభిమాని ట్వీట్ చేస్తూ.. పూరి జగన్నాధ్ పై భగ్గుమన్నది. ఎంత కండకావురం కాకపోతే కల్లు కంపౌండ్ పాటలో కేసీఆర్ మాటలు పెడతావా? అని మండిపడింది. గతంలో కెమెరామెన్ గంగతో రాంబాబు సినిమా తీసి తెలంగాణ మీద విషం కక్కే ప్రయత్నం చేశి, ఇప్పుడు నీ సినిమాల కోసం మా నాయకుడ్ని వాడుకుంటున్నాడని తీవ్ర ఆగ్రహం వ్యక్తం చేస్తూ.. ఎక్స్ లో పోస్ట్ చేసింది. కాగా పూరి కనెక్ట్స్ పతాకంపై తెరకెక్కుతున్న ఈ చిత్రం ఆగస్ట్ 15 న గ్రాండ్ గా రిలీజ్ చేయనున్నారు.