ఇంట్లో నుంచి వెళ్లి తిరిగి రాలేదు

దిశ చైతన్యపురి : కిరాణం షాపులో పెరుగు ప్యాకెట్ తీసుకు వస్తానని చెప్పి ఇంట్లో నుంచి వెళ్లి తిరిగి రాకపోవడంతో పోలీసులకు ఫిర్యాదు చేసిన ఘటన నాగోల్ పోలీస్ స్టేషన్ లో చోటుచేసుకుంది. సీఐ సూర్య నాయక్ తెలిపిన వివరాల ప్రకారం… ఖమ్మం జిల్లా తిరుమలాయపాలెం మండలానికి చెందిన నల్ల గట్టు మహేష్ పూజిత దంపతులు జైపురి కాలనీలో నివాసం ఉంటున్నారు. ఈనెల 20న సాయంత్రం మహేష్ కిరాణా షాపులో పెరుగు ప్యాకెట్ తీసుకుని వస్తానని వెళ్లి ఎంతకు తిరిగి రాలేదు. వెళ్లే సమయంలో తన మొబైల్ లో ఉన్న సిమ్ కార్డు తీసి ఇంట్లో పెట్టి తన మొబైల్ తీసుకొని వెళ్ళాడు. భార్య పూజిత చుట్టుపక్కల వెతికి బంధువులకు ఫోన్ ద్వారా వాకబు చేసిన ఆచూకీ లభించలేదు. ఈ మేరకు గురువారం తమకు ఫిర్యాదు చేయడంతో కేసు నమోదు చేసుకొని దర్యాప్తు జరుపుతున్నట్లు ఆయన తెలిపారు.