ప్రశాంతంగా గ్రూప్-3 పరీక్ష

దిశ, ఆదిలాబాద్ : ఆదిలాబాద్ జిల్లాలో ఆదివారం నిర్వహించిన మొదటి రోజు గ్రూప్-3 పరీక్ష ప్రశాంతంగా ముగిసింది. ఆదిలాబాద్ జిల్లా వ్యాప్తంగా 29 పరీక్ష కేంద్రాలలో నిర్వహించిన ఈ పరీక్షకు 10,255 మంది అభ్యర్థులు హాజరు కావాల్సి ఉండగా 6,612 మంది పరీక్ష రాశారు. ఈ సందర్భంగా జిల్లా కలెక్టర్ రాజర్షి షా, జిల్లా ఎస్పీ వేరు వేరుగా జిల్లా కేంద్రంలోని పలు సెంటర్లు, మావలలోని నలంద కళాశాల, లిటిల్ ఫ్లవర్ హైస్కూల్, తెలంగాణ మైనార్టీ రెసిడెన్సియల్ స్కూల్ లో జరుగుతున్న గ్రూప్ -3 పరీక్షలను, హాజరు శాతాన్ని పరిశీలించారు.

గ్రూప్-3 పరీక్ష కేంద్రాలను ఆయన ఆకస్మికంగా సందర్శించి, పరీక్ష జరుగుతున్న తీరును పరిశీలించి, అధికారులకు తగు సూచనలు చేశారు. మొదటి రోజు ఉదయం జరిగిన గ్రూప్-3 పేపర్-1 జనరల్ స్టడీస్ అండ్ జనరల్ ఎబిలిటీస్ పరీక్షకు జిల్లాలోని 29 పరీక్ష కేంద్రాల్లో 10,255 మంది అభ్యర్థులకు గాను 6,612 మంది (64.48 శాతం) హాజరయ్యారు. అదే విధంగా మధ్యహ్నం జరిగిన పరీక్షలో 6581 మంది హాజరు కాగా 3674 మంది గైర్హాజర్ అయ్యారని (64.17 శాతం ) కలెక్టర్ తెలిపారు. సోమవారం సైతం పరీక్షలు ప్రశాంతంగా జరిగేలా చూడాలని, ఎలాంటి పొరపాట్లకు తావు లేకుండా పకడ్బందీగా నిర్వహించాలన్నారు. పరీక్ష కేంద్రాల్లోకి ఎటువంటి ఎలక్ట్రానిక్ వస్తువులను అనుమతించరాదని, అభ్యర్థులను క్షుణ్ణంగా పరిశీలించిన అనంతరమే పరీక్ష కేంద్రంలోకి అనుమతించాలని ఆదేశించారు.