Bumrah : కోహ్లీ సెంచరీపై బుమ్రా ఆసక్తికర వ్యాఖ్యలు
దిశ, స్పోర్ట్స్ : బోర్డర్-గవాస్కర్ ట్రోఫీలో భారత్ బోణీ కొట్టింది. పెర్త్ వేదికగా జరిగిన తొలి టెస్టులో 295 పరుగుల తేడాతో టీంఇండియా ఘన విజయం సాధించింది. దీంతో సిరీస్‌లో 1-0 ఆధిక్యంలోకి దూసుకెళ్లింది. ఈ సందర్భంగా భారత తాత్కాలిక కెప్టెన్ బుమ్రా మ్యా్చ్ అనంతరం మాట్లాడారు. ‘తొలి ఇన్నింగ్స్‌లో 150 పరుగులకే జట్టు ఆలౌట్ కావడంతో ఒత్తిడికి గురయ్యాం. అయినా తమ జట్టు నమ్మకాన్ని కోల్పోలేదు. సెకండ్ ఇన్నింగ్స్‌లో భారీ స్కోరు నమోదు చేశాం. విరాట్ కోహ్లి సెంచరీ మాకు కలిసొచ్చే అంశం. జైస్వాల్ టెస్ట్ కెరీర్‌ను అద్భుతంగా ప్రారంభించాడు. పెర్త్‌లో ఆడిన ఇన్నింగ్సే జైస్వాల్ కెరీర్‌లో బెస్ట్ ఇన్నింగ్స్ అనుకుంటున్నా.’ అని బుమ్రా అన్నాడు. ‘మైదానంలో ప్రేక్షకుల మద్దతును ఆస్వాదించాం. ఈ విజయం తమలో ఆత్మవిశ్వాసాన్ని పెంచింది. అడిలైడ్ టెస్టులో పింక్ బాల్‌తో మ్యాచ్ ఆడనున్నాం. ఆ మ్యాచ్‌లో విజయం కోసం మళ్లీ జీరో నుంచే ప్రారంభాంచాల్సి ఉంది. పెర్త్ టెస్ట్ మ్యాచ్ సందర్భంగా అనేక విషయాలను నేర్చుకున్నామని బుమ్రా అన్నాడు.
