మోడల్ మిలింద్ సోమన్ పై కేసు నమోదు

దిశ,వెబ్ డెస్క్: అశ్లీలతను ప్రోత్సహిస్తున్నారనే కారణంతో ప్రముఖ మోడల్, నటుడు మిలింద్ సోమన్ పై గోవా పోలీసులు కేసు నమోదు చేశారు. ఆయన తన పుట్టిన రోజును పురస్కరించుకుని ఇటీవల తాను గోవా బీచ్ లో నగ్నంగా పరుగెత్తుతున్న ఫోటోలను తన ఇన్ స్టా గ్రాం ఖాతాలో బుధవారం పోస్టు చేశారు. ఈ ఫోటో వైరల్ అయింది. దీనిపై నెటిజన్లు ప్రశంసల వర్షం కురిపించారు. కాగా ఈ విషయంపై పోలీసులకు గోవా సురక్షా మంచ్ పార్టీ గురువారం ఫిర్యాదు చేసింది. మరుసటి రోజే మిలింద్ సోమన్ పై పోలీసులు కేసు నమోదు చేశారు.

తన 55వ పుట్టిన రోజును పురస్కరించుకుని తన భార్య అంకిత్ కోన్వర్‌ను ఉద్దేశిస్తూ గోవా బీచ్ లో తాను బట్టలు లేకుండా పరుగెత్తుతున్న ఫోటోలను మిళింద్ సోమన్ అప్ లోడ్ చేశారు. దీనిపై గోవా సురక్షా మంచ్ ఆగ్రహం వ్యక్తం చేసింది. బహిరంగ ప్రదేశంలో ఆయన అశ్లీలంగా సంచరించారనీ, గోవాను తప్పుడు పద్దతిలో చూపించే విధంగా ఆ ఫోటోలు ఉన్నాయంటూ పోలీసులకు గోవా సురక్షా మంచ్ ఫిర్యాదు చేసింది.

దీంతో మిళింద్ సోమన్ పై ఐపీసీ సెక్షన్ 294 , ఐటీ యాక్ట్ సెక్షన్ 67కింద కేసు నమోదు చేసినట్టు గోవా ఎస్.పీ పంకజ్ కుమార్ తెలిపారు. కాగా దక్షిణ గోవాలోని కంకోనాలో ఓ డ్యామ్ వద్ద ప్రభుత్వ స్థలంలోకి అనుమతి లేకుండా ప్రవేశించారనీ, అందులో అభ్యంతరకర వీడియోలను చిత్రీకరించారన్న కారణంతో ప్రముఖ మోడల్ పూనమ్ పాండేను ఆమె భర్తను పోలీసులు అరెస్టు చేసిన సంగతి తెలిసిందే..