రూ. 500లకే మైనర్ల న్యూడ్ వీడియోలు.. నెట్టింట్లో 4 వేల లింకులు
దిశ, వెబ్‌డెస్క్: నెట్టింట్లో మైనర్ల నీలిచిత్రాల వ్యవహారం కలకలం రేపింది. ఒకటి కాదు రెండు కాదు ఏకంగా నాలుగు వేల నీలిచిత్రాల లింకులను ఓ వ్యక్తి అమ్ముకోవడం హాట్‌ టాపిక్‌గా మారింది. ఢిల్లీకి చెందిన ఒకరికి కొద్ది రోజుల క్రితం మొబైల్‌లో వాట్సాప్ మెసేజ్ వచ్చింది. తక్కువ ధరకే బ్లూ ఫిల్మ్ వీడియోలు, ముఖ్యంగా మైనర్ల నగ్న వీడియోలు పంపబడును అనేది ఆ మెసేజ్ సారాంశం.
ఆ మెసేజ్ చూసి షాక్ అయిన వ్యక్తి వెంటనే లింకులు పంపిన నెంబర్‌తో కాంటాక్ట్ అయ్యాడు. రూ. 2 వేలు ఇస్తాను వీడియోలు సెండ్ చేయమనగానే.. రూ. 500 మాత్రమే ఇవ్వండి అంటూ రిప్లై వచ్చింది. దీంతో ఢిల్లీకి చెందిన కస్టమర్ ఆన్‌లైన్‌లో అమౌంట్ ట్రాన్స్‌ఫర్ చేసిన వెంటనే.. కేవలం మైనర్లకు సంబంధించిన 4 వేల న్యూడ్ వీడియో లింకులు రావడంతో ఆశ్చర్యపోయాడు.
ఆ వీడియో లింకులను ఢిల్లీలోని జాతీయ చిన్నారుల హక్కుల పరిరక్షణ కమిషన్‌(NCPCR) దృష్టికి తీసుకెళ్లి చర్యలు తీసుకోవాల్సిందిగా ఫిర్యాదు చేశాడు. వెంటనే యాక్షన్ తీసుకున్న NCPCR ఐపీ అడ్రస్ ఆధారంగా హైదరాబాద్‌ పోలీసులకు సమాచారం ఇవ్వడంతో పాటు అరెస్ట్ చేయాల్సిందిగా సూచించారు. ఈ ఫిర్యాదును స్వీకరించిన పోలీసులు నేరస్థుడు విజయవాడలో ఉన్నట్టు లొకేషన్ ఆధారంగా గుర్తించారు. అసలు ఈ వీడియోలు ఎక్కడ తీశారు.. ఏ సైట్ నుంచి అప్‌లోడ్ చేస్తున్నారన్న విషయాలపై పోలీసులు కూపీలాగుతున్నారు. నిందితుడిని అరెస్ట్ చేసేందుకు రంగం సిద్ధం చేశారు.
