గుజరాత్ ప్రజలు BJP వైపే: P.M. Narendra Modi కీలక వ్యాఖ్యలు

దిశ, వెబ్‌డెస్క్: గుజరాత్ అసెంబ్లీ ఎన్నికల్లో బీజేపీ అఖండ విజయం సాధించింది. గత ఎన్నికల్లో 99 సీట్లకే పరిమితమైన బీజేపీ.. ఈ సారి 156 స్థానాలతో విజయ డంకా మోగించింది. ప్రతిపక్ష కాంగ్రెస్‌ను కోలుకోలేని దెబ్బ కొట్టిన బీజేపీ.. హస్తాన్ని కేవలం 17 సీట్లకు మాత్రమ పరిమితం చేసింది. మొత్తం 182 స్థానాలకు గాను 156 స్థానాల్లో విజయం సాధించి.. వరుసగా 7వ సారి గుజరాత్‌లో కాషాయ జెండా ఎగరేసింది. సొంత రాష్ట్రమైన గుజరాత్‌లో బీజేపీ భారీ విజయం సాధించడం పట్ల ప్రధాని మోడీ హర్షం వ్యక్తం చేశారు. ఈ సందర్భంగా మోడీ గుజరాత్ ప్రజలను ఉద్దేశించి మాట్లాడారు. గుజరాత్ ప్రజలు బీజేపీ వైపేనని మరోసారి నిరూపించారని పేర్కొన్నారు. ప్రజల ఆశీర్వాదంతోనే గుజరాత్‌లో మళ్లీ గెలిచామని తెలిపారు. ప్రజాస్వామ్య పండుగను ప్రజలు పరిపూర్ణంగా జరుపుకున్నారన్నారు. గుజరాత్‌లో 156 సీట్లలో విజయం సాధించడం బీజేపీ కార్యకర్తల కష్టానికి ఫలితం అని అన్నారు. ఉత్తరప్రదేశ్, బీహార్ ఉపఎన్నికల్లో బీజేపీ గెలుపు.. భవిష్యత్ విజయాలకు సంకేతమని దీమా వ్యక్తం చేశారు.