విమానంలో స్మోకింగ్.. సిబ్బందితో వాగ్వాదం.. సీటుకు కట్టేసిన పోలీసులు
ముంబై: ఈ మధ్య కాలంలో విమానాల్లో ప్రయాణీకులు దురుసుగా ప్రవర్తిస్తున్న కేసులు పెరుగుతున్నాయి. లండన్ నుంచి ముంబై విమానంలో తోటి ప్రయాణీకులతో తప్పుగా ప్రవర్తించడమే కాకుండా బాత్రూంలో సిగరెట్ తాగినట్లు ఆరోపిస్తున్న యూఎస్ వ్యక్తిపై కేసు నమోదైంది. విమానంలో అసౌకర్యానికి గురి చేసిందనందుకు గానూ ముంబై సహర్ పోలీస్ స్టేషన్లో కేసు నమోదు చేశారు. బాత్రూంలో స్మోకింగ్ చేయడంతో సైరన్ మోగడంతో విమాన సిబ్బంది అప్రమత్తమై అడ్డుకున్నారు.
దీంతో ఆగ్రహాంతో ఆ వ్యక్తి సిబ్బందిపై కేకలు వేసినట్లు పోలీసులు ఫిర్యాదులో పేర్కొన్నారు. ఈ క్రమంలో అతడిని నిలువరించేందుకు సీటులో కూర్చొబెట్టగా, ఎగ్జిట్ డోర్ తీసేందుకు ప్రయత్నించినట్లు తెలిపారు. దీంతో తప్పనిసరి పరిస్థితుల్లో కాళ్లు, చేతులు కట్టేసినట్లు చెప్పారు. విమానం ల్యాండైన తర్వాత ఆ వ్యక్తిని పోలీసులకు అప్పగించారు. వ్యక్తి మానసిక స్థితిని తెలుసుకునేందుకు వైద్య పరీక్షలు నిర్వహించారు.
