కర్ణాటకలో దారుణం.. మతాలు వేరని యువతి,యువకుడిపై దాడి..!

దిశ, నేషనల్ బ్యూరో: కర్ణాటకలోని బెలగావిలో దారుణం జరిగింది. యువతి, యువకుడిపై ఆకతాయి బృందం వారిపై దాడికి పాల్పడింది. భిన్న మతాలకు చెందిన యువతి, యువకుడు పక్క పక్కన కూర్చున్నారనే కారణంతో దాడి చేశారు. తనని విడిచిపెట్టాలని కోరినా.. యువకుడిని పైపులు, రాడ్లతో చితక బాదారు. యువతిని వేధించారు. వివరాల్లోకెళ్తే ప్రభుత్వ పథకం దరఖాస్తు చేసుకునేందుకు బాధితులు వచ్చారు. లంచ్ బ్రేక్ కావడంతో.. గంట తర్వాత రావాలని అధికారులు సూచించారు. దీంతో బెళగావిలోని కిల్లా సరస్సు దగ్గరకు బాధితులిద్దరూ వెళ్లారు. అక్కడ కూర్చొని వారు మాట్లాడుతుండగా.. ఆకతాయి బృందం దాడి చేసింది. బాధితులను గదిలోకి తీసుకెళ్లి వేధించారు. సాయంత్రం 6.30 తర్వాత యువతి, యువకుడిని వదిలిపెట్టారు. వారి దగ్గర్నుంచి ఫోన్లు, రూ.7 వేలు నగదు తీసుకుని పరారయ్యారు. బాధితులిద్దరూ పోలీసులకు ఫిర్యాదు చేయడంతో.. మొత్తం 9 మంది నిందితుల్ని అరెస్టు చేశారు. వారిలో ఇద్దరు మైనర్లు. నిందితులపై అట్రాసిటీ కేసు నమోదు చేశారు. మరోవైపు ఈకేసులో అరెస్టులు జరిగాయని.. పోలీసులు దర్యాప్తు చేపడుతున్నారని కర్ణాటక హోంమంత్రి పరమేశ్వర తెలిపారు.