Hawaii volcano: బద్దలైన అగ్నిపర్వతం.. ఎగిసిపడుతున్న లావా

దిశ, వెబ్ డెస్క్: అమెరికాలోని (America) హవాయి అగ్నిపర్వతం (Hawaii volcano) బద్దలైంది. ప్రపంచంలోని అత్యంత చురుకైన కిలోవియా శిఖరంపై ఉన్న ఈ అగ్నిపర్వత బిలం నుంచి గతేడాది డిసెంబర్‌ 23న విస్ఫోటం మొదలైనట్లు హవాయి అగ్నిపర్వత అబ్జర్వేటరీ అధికారులు తెలిపారు. అగ్నిపర్వతం క్రమంగా విస్ఫోటం చెందుతూ ఒక్కసారిగా తీవ్రరూపం దాల్చింది. దీంతో 100 అడుగుల ఎత్తుకు లావా ఓ ఫౌంటెయిన్‌లా ఎగసిపడుతుంది.

ప్రస్తుతం లావా 150 నుంచి 165 అడుగుల వరకు ఎగసిపడుతోందని అధికారులు చెప్పారు. మరింత ఎత్తుకు చేరే అవకాశం ఉందని పేర్కొంటున్నారు. అయితే ఈ పర్వతం ఎత్తైన ప్రాంతంలో ఉన్నందువల్ల స్థానిక నివాసితులకు ఎలాంటి ముప్పు లేదని అన్నారు. అగ్నిపర్వతం వద్ద తీవ్రత ఎక్కువగా ఉండటంతో ఆ ప్రాంతాన్ని నో ఫ్లై జోన్‌గా ప్రకటించారు. పర్వత ప్రాంత సమీపంలోకి ప్రజలు ఎవరూ వెళ్లకుండా కఠిన ఆంక్షలు విధించారు.