BREAKING: బీజేపీ అభ్యర్థుల ఐదో జాబితా రిలీజ్.. స్టార్ హీరోయిన్‌కు MP టికెట్
దిశ, వెబ్‌డెస్క్: పార్లమెంట్ ఎన్నికల షెడ్యూల్ విడుదల కావడంతో ఎంపీ అభ్యర్థుల ఎంపికలో బీజేపీ దూకుడు పెంచింది. ఈ సారి 400 ఎంపీ సీట్లు లక్ష్యంగా పెట్టుకున్న కాషాయ పార్టీ.. తీవ్ర కసరత్తు అనంతరం క్యాండిడేట్ల లిస్ట్‌ను ప్రకటిస్తుంది. ఇందులో భాగంగా వచ్చే లోక్ సభ ఎన్నికల్లో పోటీ చేయబోయే అభ్యర్థులకు సంబంధించి ఇప్పటి వరకు నాలుగు జాబితాలను రిలీజ్ చేసిన బీజేపీ.. ఆదివారం ఎంపీ అభ్యర్థుల మరో లిస్ట్‌ను విడుదల చేసింది. 111 మంది అభ్యర్థులతో బీజేపీ ఇవాళ ఐదో లిస్ట్‌ను రిలీజ్ చేసింది. ఇందులో బాలీవుడ్ స్టార్ హీరోయిన్ కంగనా రనౌత్‌కు బీజేపీ టికెట్ కేటాయించింది.
కంగనా బీజేపీ తరుఫున ఎంపీ పోటీ చేయబోతున్నారంటూ గత కొన్ని రోజులుగా జరుగుతోన్న ప్రచారాన్ని నిజం చేస్తూ ఎట్టకేలకు ఐదో లిస్ట్‌లో కమలం పార్టీ ఆమెకు టికెట్ కేటాయించింది. హిమాచల్ ప్రదేశ్‌లోని మండీ పార్లమెంట్ స్థానం నుండి బీజేపీ ఎంపీ అభ్యర్థిగా కంగనా బరిలోకి దిగనున్నారు. బీజేపీ అధికారికంగా టికెట్ ప్రకటించడంతో కంగనా పొలిటికల్ ఎంట్రీపై నెలకొన్న ఉత్కంఠకు తెరపడింది. ఐదో జాబితాలో కంగనాతో పాటు మరో స్టార్ టీవీ యాక్టర్‌ అరుణ్ గోవిల్‌కు బీజేపీ టికెట్ ప్రకటించింది. హిందీ రామాయణం సీరియల్ ద్వారా పేరు పొందిన అరుణ్ గోవిల్ ఉత్తర ప్రదేశ్‌లోని మీరట్ పార్లమెంట్ స్థానం నుండి బీజేపీ అభ్యర్థిగా పోటీ చేయనున్నారు.
