లోక్‌సభ ఎన్నికల వేళ బిగ్ ట్విస్ట్.. బీజేపీపై అరవింద్ కేజ్రీవాల్ సంచలన వ్యాఖ్యలు
దిశ, వెబ్‌డెస్క్: కేంద్రంలోని బీజేపీ ప్రభుత్వాన్ని గద్దె దింపడమే లక్ష్యంగా విపక్షాలు ఏకమై ఏర్పాటు చేసిన ఇండియా కూటమి పతనం దిశగా సాగుతోంది. కూటమిలోని పార్టీలు ఇప్పటికే ఎవరికి వారుగా ఒంటరిగా లోక్‌సభ ఎన్నికల బరిలో దిగుతున్నట్లు వెల్లడించాయి. ఈ క్రమంలో ఆప్ నేత, పంజాబ్ ముఖ్యమంత్రి భగవంత్ మాన్ రాబోయే ఎన్నికల్లో తమ పార్టీ ఎవరితోను పొత్తు పెట్టుకోదని ప్రకటించారు. అదేవిధంగా పశ్చిమ బెంగాల్ ముఖ్యమంత్రి మమతా బెనర్జీ ఒంటరిగా ఎన్నికల రణరంగంలోకి దిగుతున్నట్లు ప్రకటించింది.
జేడీయూ అధినేత నితీష్ కుమార్ సైతం మళ్లీ ఎన్డీఏలో చేరేందుకు రంగం సిద్ధం చేసుకుంటున్నారు. బీజేపీ ఎమ్మెల్యేల మద్దతుతో మళ్లీ ప్రభుత్వాన్ని ఏర్పాటు చేసేందుకు ప్రణాళికలు రూపొందిస్తున్నారు. ఈ క్రమంలో ఢిల్లీ ముఖ్యమంత్రి అరవింద్ కేజ్రీవాల్ బీజేపీ ప్రభుత్వంపై ఘాటు వ్యాఖ్యలు చేశారు. తమ పార్టీ నుంచి ఏడుగురు ఎమ్మెల్యేలను కొనేందుకు బీజేపీ ప్రయత్నిస్తోందని ఆరోపించారు. ఒక వేళ బీజేపీలోకి వెళితే అందుకు బదులుగా ఒక్కో ఎమ్మెల్యేకు రూ.25 కోట్లు ఆఫర్ చేసిందంటూ బాంబు పేల్చారు. ఢిల్లీలోని ఆప్ ప్రభుత్వాన్ని కూలగొట్టేందుకు అన్ని శక్తులను ఉపయోగిస్తున్నారని మండిపడ్డారు.
