'ఆదిపురుష్'పై మంచు విష్ణు షాకింగ్ కామెంట్స్.. ప్రభాస్ ఫ్యాన్స్ ఏమంటారో?
దిశ, సినిమా: ప్రభాస్ నటించిన లేటెస్ట్ మూవీ 'ఆదిపురుష్' భారీ ఎత్తున ట్రోలింగ్ ఎదుర్కొంటున్న సంగతి తెలిసిందే. కాగా.. తాజాగా ఈ సినిమా గురించి టాలీవుడ్ హీరో మంచు విష్ణు ఇంట్రెస్టింగ్ కామెంట్స్ చేశాడు. ఈ మేరకు సినిమా టీజర్ చూశాక తాను దారుణంగా మోసపోయినట్లు అనిపించిందన్నాడు. ప్రభాస్, సైఫ్‌లతో కూడిన లైవ్ యాక్షన్ సినిమాగా ప్రేక్షకులతోపాటు తాను ఆశించినట్లు తెలుపుతూ..
'నేను ఒక తెలుగువాడిగా నా అభిప్రాయాన్ని పంచుకుంటున్నా. వాళ్లు రామాయణం తీస్తున్నారు కాబట్టి మెయిన్ స్ట్రీమ్ లైవ్ యాక్షన్ చిత్రం అవుతుందని భావించాం. యానిమేషన్ చిత్రమని ఎవరూ ఊహించలేదు. అందుకే అందరితోపాటు నేను దారుణంగా నిరుత్సాహానికి గురయ్యాను. సినిమాను చూపించేందుకు ప్రేక్షకులను మేకర్స్ సిద్ధం చేయాలి. లేదంటే అభిమానుల నుంచి స్పందన భిన్నంగా ఉంటుంది. నేనైతే మోసపోయానని భావిస్తున్నా. టీజర్ చూస్తున్నప్పుడు నాకు రజనీకాంత్ 'కొచ్చాడియాన్' చిత్రం గుర్తుకు వచ్చింది' అంటూ తన ఫీలింగ్ బయటపెట్టాడు. అలాగే టీజర్‌పై ప్రేక్షకులు ఎందుకు తీవ్రంగా రియాక్ట్ అవుతూ భిన్న వాదనలు వినిపించారో పూర్తిగా అర్థమైందంటూ ముగించాడు. మరి మంచు విష్ణు కామెంట్స్‌కు ప్రభాస్ ఫ్యాన్స్ ఎలా రియాక్ట్ అవుతారో చూడాలి.
