Producer Dil Raju: రివ్యూలు రాసేవారు సినిమాలు తీస్తే.. నేను ఆ సినిమాకు రివ్యూ రాస్తా: నిర్మాత దిల్ రాజు
దిశ, సినిమా: వంశీ రామ్ పెండ్యాల, అజయ్, స్వాతి భీమిరెడ్డి, ఏపూరి హరి ప్రధాన పాత్రల్లో నటించిన సినిమా రేవు. హరినాథ్ పులి దర్శకత్వం వహించిన ఈ చిత్రాన్ని సంహిత్ ఎంటర్టైన్మెంట్స్ బ్యానర్, పారుపల్లి ప్రొడక్షన్‌పై నిర్మాత డా. మురళీ గింజుపల్లి, నవీన్ పారుపల్లి సంయుక్తంగా నిర్మించారు. ఆగస్టు 23న రిలీజ్‌కు సిద్ధంగా ఉన్న ఈ చిత్రం నుంచి తాజాగా ట్రైలర్‌ను లాంచ్ చేశారు మేకర్స్. ఈ వేడుకకు ముఖ్య అతిథిగా విచ్చేసిన దిల్ రాజు మూవీపై ఆసక్తికర కామెంట్స్ చేశారు.
‘రేవు కాన్సెప్ట్ బాగుంది. రాంబాబు, ప్రభు నాకు చాలా మంచి సన్నిహితులు. వారు ఈ చిత్రం గురించి చెప్పారు. వీళ్లు వెనకాల ఉండి ఈ సినిమాను తీశారు కాబట్టి.. నేను ముందుండి నడిపించాలని అనుకున్నాను. ఇంత వరకు వీళ్ళు సినిమాని చూసి రివ్యూ రాశారు. ఇప్పుడు వీళ్ళు సినిమాను తీశారు. కాబట్టి వీళ్ళ సినిమాని చూసి నేను రివ్యూ రాస్తా’ అని అన్నారు. దర్శకుడు కోదండ రామిరెడ్డి మాట్లాడుతూ.. ‘రేవు మూవీ పెద్ద విజయం సాధించాలని కోరుకుంటున్నాను’ అని అన్నారు.
