డ్రగ్స్ కేసులో మరికొంతమంది తెలంగాణ ఎమ్మెల్యేలు?

దిశ, వెబ్‌డెస్క్: తెలంగాణలో గత కొద్దిరోజులుగా సంచలనం రేపుతున్న బెంగళూరు డ్రగ్స్ కేసుకు సంబంధించి తాజాగా మరో వార్త కలకలం రేపుతోంది. ఈ కేసులో మరికొంతమంది తెలంగాణ ఎమ్మెల్యేలు ఉన్నట్లు ప్రచారం జరుగుతోంది. ఈ కేసులో సూత్రధారిగా ఉన్న కన్నడ సినీ నిర్మాత శంకరగౌడ ఏర్పాటు చేసే పార్టీలకు తెలంగాణకు చెందిన కొంతమంది ఎమ్మెల్యేలు హాజరయ్యేవారని పోలీసులు గుర్తించినట్లు వార్తలొస్తున్నాయి.

ప్రస్తుతం శంకరగౌడను విచారిస్తున్న పోలీసులు.. అతడి నుంచి తెలంగాణ ఎమ్మెల్యేల పేర్లను బయటకుతీసే ప్రయత్నాల్లో ఉన్నారు. అలాగే ఈ కేసులో ఇప్పటికే అరెస్ట్ అయిన వ్యాపారి కలహర్ రెడ్డి, ట్రావెల్స్ యాజమాని రతన్ రెడ్డి నుంచి వాంగ్మూలం తీసుకుంటున్నారు. శంకరగౌడ ఏర్పాటు చేసే పార్టీలకు తెలంగాణ ఎమ్మెల్యేలను తీసుకొచ్చే బాధ్యతను కలహర్ రెడ్డి, రతన్ రెడ్డి చూసుకునేవారని పోలీసులు గుర్తించారు. ఈ కేసులో నిందితులను గుర్తించేందుకు వీరిద్దరే కీలకంగా మారారు.

కాగా, డ్రగ్స్ కేసులో నలుగురు టీఆర్‌ఎస్ ఎమ్మెల్యేలు ఉన్నట్లు ఇప్పటికే వార్తలొచ్చిన విషయం తెలిసిందే. వికారాబాద్, నిజామాబాద్, ఉమ్మడి మహబూబ్‌నగర్ జిల్లాల ఎమ్మెల్యేలు ఉన్నట్లు ప్రచారం జరిగింది. ఒక ఎమ్మెల్యే తన వెంట చాలామంది ఎమ్మెల్యేలను తీసుకెళ్లేవారని పోలీసులు గుర్తించారు.