వింత ప‌ద్ధ‌తిలో ఫ్రూట్స్ అమ్మకం.. వీధివ్యాపారి క్రేజీ స్టైల్! (వీడియో)
దిశ, వెబ్‌డెస్క్ః ఇంట‌ర్నెట్‌లో వైరల్ వీడియోలకు కొదువ ఉండ‌దు నిజ‌మే.. కానీ, కొన్ని వీడియోలు చాలా ప్ర‌త్యేకంగా ఉంటాయి. ముఖ్యంగా స్ట్రీట్ క‌ల్చ‌ర్‌ను చూపించే వీడియోల్లో ఈ వైవిధ్యం ఎక్కువ‌గా క‌నిపిస్తుంది. సాధార‌ణంగా, పోటీ అధికంగా ఉండే వీధి వ్యాపార‌స్థులు వ్యాపార వృద్ది కోసం ఇలాంటి ప్రత్యేకమైన మార్గాలను ఆచ‌రిస్తుంటారు. అలాంటి ఓ వ్య‌క్తి ఇప్పుడు నెట్టింట్లో హ‌ల్‌చ‌ల్ చేస్తున్నాడు. తోపుడు బండిపై బొప్పాయి, పుచ్చకాయ వంటి పండ్లను అమ్మే యాసిన్ అనే వీధి వ్యాపారి స్టైల్ కాస్త క్రేజీగా క‌నిపిస్తుంది. గుండె నొప్పి ఉన్న‌వారికి కాస్త ఇబ్బంది క‌లిగించినా, మిగిలిన వారికి మాత్రం ఫ‌న్నీగా, వింత‌గా తోస్తుంది. అతడు పండ్లు అమ్మే విధానం అరుపులు కేక‌ల‌తో అల‌జ‌డి సృష్టించ‌డ‌మే కాదు, భేషుగ్గా వ్యాపారాన్ని అభివృద్ధి చేస్తోందంట!
మార్కెట్‌లో అత్యంత నోరూరించే పండ్లను తాను అమ్ముతున్నాడ‌ని చెప్పే క్ర‌మంలో యాసిన్ తన కస్టమర్‌లను ఆక‌ర్షించ‌డానికి ఈ జిమ్మిక్కును ఉపయోగిస్తాడు. అతడు పండ్లను రెండుగా కోసే వరకు అంతా బాగానే ఉంటుంది. కానీ, వెంటనే చాలా బిగ్గరగా, భ‌యం గొలిపే ర‌క‌ర‌కాల శ‌బ్ధాల‌ను చేస్తాడు. అంతేనా, స్టీల్ ట్రేతో తలపై కొట్లుకోవ‌డం, విచిత్ర‌మైన ముఖ క‌వ‌ళిక‌లు చూపించ‌డం వంటి చేష్ట‌ల‌తో ఆక‌ట్టుకుంటాడు. దీని వ‌ల్ల తనకు ఎదురుగా ఉన్న స్టాల్ కంటే తన అమ్మకం ఎక్కువ‌గా ఉంటుంద‌ని, తాను మార్కెట్‌లో రెండు గంటలు మాత్రమే పండ్లను విక్రయిస్తానని, వాటిని కొనుగోలు చేసేందుకు దూరప్రాంతాల నుంచి క‌స్ట‌మ‌ర్లు వస్తారని, ప్రత్యేకించి తన పండ్లను కొనుగోలు చేస్తారని వీడియోలో తెలిపాడు. "క్రేజీయెస్ట్ ఫ్రూట్ సెల్లర్ ఆఫ్ ఇండియా" పేరుతో యూట్యూబ్‌లో షేర్ చేసిన ఈ వీడియో వైరల్ అవుతోంది.
