మనోజ్ పాటకు కేటీఆర్ ఫిదా

దిశ వెబ్ డెస్క్: హీరో మంచు మ‌నోజ, తన మేనకోడలతో కలిసి పాడిన ‘అంతా బాగుంటాం రా’ పాటకు అంతటా ప్రశంసలు వెల్లువెత్తుతున్నాయి. తాజాగా మంత్రి కేటీఆర్ కూడా ఈ పాటను ప్రశంసించారు. ఇప్పటికే కరోనా పై అవగాహన కలిగిస్తూ ఎంతోమంది సినీ ప్రముఖులు పాటలు పాడారు. మంచు మనోజ్ అందరికంటే కాస్త భిన్న రీతిలో ఈ పాటను ట్రై చేశారు. ఈ పాటలో వైద్య సిబ్బంది, పోలీసులు, రైతులు, పారిశుద్ధ్య కార్మికుల సేవలను కొనియాడారు.

కరోనా వేళ ప్రజలకి స్ఫూర్తినిచ్చే విధంగా ‘అంతా బాగుంటాం ..రా’ అనే పాట‌ను ఆదివారం సోషల్ మీడియాలో, యూట్యూబులో విడుదల చేశారు మంచు మనోజ్. ఈ పాటను చూసిన తెలంగాణ మంత్రి కేటీఆర్ పాటపై స్పందించారు. ‘‘ఈ చీకటి ఇలాగే ఉండిపోదని, మళ్ళా వెలుగు వస్తుందని, గొప్ప ఆత్మ స్థైర్యం ఇచ్చే గీతం’’ అంటూ ఆయ‌న ప్ర‌శంసించారు. ‘‘హీరో మ‌నోజ్ పాడిన ఈ పాట మ‌న హృదయాలను ఆశతో నింపుతుంది. అందరిలోనూ స్ఫూర్తి నింపుతుంది’ అని ట్వీట్ చేశారు. కేటీఆర్ ట్వీట్ కు మనోజ్ ధన్యవాదాలు తెలిపారు. ‘మన సంరక్షణ కోసం.. ఇలాంటి ఆపత్కాలంలో పనిచేస్తున్న వైద్యులు, పోలీసులు, పారిశుద్ధ్య కార్మికులకు ఈ పాట అంకితం’ అని ఈ సందర్భంగా మనోజ్ పోస్ట్ చేశారు. ఈ పాట‌ను ప్ర‌ముఖ గేయ‌ర‌చ‌యిత‌ కాస‌ర్ల శ్యామ్ రాయ‌గా, అచ్చు రాజ‌మ‌ణి సంగీతం స‌మ‌కూర్చారు. వాయిస్ ఓవ‌ర్‌ను శ్రీ‌కాంత్ ఎన్‌. రెడ్డి రాయ‌గా, స‌న్నీ కూర‌పాటి ఫొటోగ్ర‌ఫీ అందించారు. వ‌ర ఎడిటింగ్ చేశారు.

tags :ktr , manchu manoj, antha baguntam raa raa song, compliments