భీముడు, హిడింబిల వివాహం జరిగిన పుణ్యస్థలం.. అనేక రహస్యాలకు నిలయం..
దిశ, వెబ్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌డెస్క్ : ఛత్తీస్‌గఢ్‌ అనేక హిందూ దేవాలయాలకు నెలవు. ఛత్తీస్‌గఢ్‌ లోని మహాసముంద్ జిల్లాలో ఎన్నో రహస్యాలు దాగి ఉన్న మాతా ఖల్లారి ఆలయం ఉంది. ఈ ఆలయం దగ్గరే మహాబలుడు భీముడు, హిడింబల వివాహం జరిగిందని పురాణాలు చెబుతున్నాయి. స్థలపురాణం ప్రకారం అక్కడే మాతా ఖల్లారి ఆలయాన్ని నిర్మించారని చెబుతారు. ఖల్లారి గ్రామంలోని కొండపైన ఖల్లారి మాత ఆలయం ఉంది. ప్రతి సంవత్సరం చైత్ర నవరాత్రుల సందర్భంగా ఈ దుర్గమ కొండకు దర్శనం కోసం పెద్ద సంఖ్యలో భక్తులు వస్తుంటారని చెబుతారు.
బాలిక రూపంలో అమ్మవారు..
అమ్మవారు ఖల్లారిలో జరిగే జాతరకు ఆడపిల్ల రూపంలో వచ్చేదని పురాణాలు చెబుతున్నాయి. ఇంతలో జాతరకు వచ్చిన ఓ సంచారి మాత రూపానికి పరవశించిపోయి ఆమెను అనుసరించి కొండపైకి చేరుకున్నాడు. దీంతో ఆ తల్లికి కోపం వచ్చి ఆ సంచారజీవిని శపించి రాయిగా మార్చేసి అక్కడే కూర్చుందని పురాణాలు చెబుతున్నాయి.
మరో కథనం..
మహాభారత యుగంలో పాండవులు తమ ప్రయాణంలో ఈ కొండపైకి వచ్చారని పురాణాలు చెబుతున్నాయి. ఈ కొండ పై స్పష్టంగా కనిపిస్తున్న భీముని భారీ పాదముద్రలే అందుకు నిదర్శనం. పురాతన కాలంలో ఈ ప్రదేశాన్ని ఖల్వాటిక అని పిలిచేవారు.
మహాభారత కాలంలో తండి అనే రాక్షసుడు ఇక్కడ నివసించేవారని చెబుతారు. అతనికి హిడింబి అనే సోదరి కూడా ఉండేదట. మహాబలి భీముడు ఒకసారి ఈ ప్రదేశంలో విశ్రాంతి తీసుకుంటున్న సమయంలో అక్కడికి చేరుకున్న హిడింబి భీముడిని చూసి ఇష్టపడిందట. అయితే రాక్షసుడు తండికి భీమునితో జరిగిన యుద్దంలో రాక్షసుడు మరణించాడు. ఆ తరువాత తల్లి కుంతీ ఆజ్ఞతో భీముడు రాక్షసి హిడింబిని వివాహం చేసుకున్నాడని చెబుతారు.
