అనుమానస్పద స్థితిలో రైతు మృతి

దిశ, జగదేవ్ పూర్ ; అనుమానస్పద స్థితిలో ఓ రైతు మృతి చెందిన సంఘటన ఆదివారం సిద్ధిపేట జిల్లా జగదేవ్ పూర్ మండల పరిధిలోని ధర్మారం గ్రామ సమీపంలోని బోరబండ ప్రాజెక్ట్ లో వెలుగు చూసింది. స్థానిక ఎస్సై చంద్రమోహన్, గ్రామస్తుల కథనం ప్రకారం వివరాలిలా ఉన్నాయి. మర్కూక్ మండలం వరదరాజ్ పూర్ గ్రామానికి చెందిన ముచ్చపతి సత్యనారాయణ (58) అనే రైతు వ్యవసాయం చేసుకుంటూ జీవనం సాగిస్తున్నాడు. ఇందులో భాగంగా శనివారం ఉదయం సుమారు 11 గంటల సమయంలో సత్యనారాయణ రోజు మాదిరిగానే పొలం పనుల కోసం ఇంటి నుంచి వెళ్ళాడు. కాగా వేరే గ్రామానికి వెళ్లి ఆదివారం ఉదయం ఇంటికి వచ్చిన సత్యనారాయణ కుమారుడు ముచ్చపతి హిమవంత్ తన తండ్రి ఆచూకీ కోసం పలు ప్రాంతాల్లో వెతకగా ధర్మారం గ్రామ సమీపంలోని బోరబండ సాగునీటి ప్రాజెక్ట్ లో సత్యనారాయణ శవమై తేలాడు. మృతుడి కుమారుడు హిమవంత్ ఇచ్చిన ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై చంద్రమోహన్ వివరించారు.