రోడ్డు ప్రమాదంలో ఇద్దరు సజీవ దహనం

అమరావతి: పశ్చిమగోదావరి జిల్లాలో ఘోర రోడ్డు ప్రమాదం జరిగింది. వ్యాన్ అదుపు తప్పి చెట్టును ఢీకొట్టడంతో ఇద్దరు వ్యక్తులు సజీవ దహనం అయ్యారు. ఈ ఘటన పెంటపాడు మండలం అలంపురం సమీపంలోని జాతీయ రహదారిపై చోటుచేసుకుంది. వివరాల్లోకెళ్తే.. గుంటూరు నుంచి తణుకు వైపు ‘స్పిరిట్’ లోడుతో వెళ్తున్న వ్యాను.. అదుపు తప్పి రోడ్డు పక్కనే ఉన్న చెట్టును బలంగా ఢీకొట్టింది. దీంతో వ్యాన్‌లో ఒక్కసారిగా మంటలు చెలరేగాయి. క్షణాల్లో వ్యాన్ మొత్తం అగ్నికీలలు వ్యాపించడంతో డ్రైవర్, క్లీనర్ అందులోనే చిక్కుకుని సజీవ దహనం అయినట్లు ప్రత్యక్ష సాక్షులు తెలిపారు. విషయం తెలుకున్న పోలీసులు.. ఘటనా స్థలానికి చేరుకుని పరిశీలించారు. కేసు నమోదు చేసుకుని విచారణ చేపట్టినట్టు వెల్లడించారు.

Tags: road accident, west godavari, crime, ap news