దారుణం: తండ్రిని చంపిన తనయుడు

దిశ,బాన్సువాడ: కన్న తండ్రినే కసాయి వాడిలా కర్రతో తలపై, ఛాతిపై రక్తంవచ్చేల దారుణంగా కొట్టి హత్య చేసిన ఘటన వర్ని పోలీస్ స్టేషన్ పరిధిలోని శ్యామ్ రావు తండాలో శుక్రవారం చోటుచేసుకుంది. హత్యకు సంబంధించిన వివరాలు ఇలా ఉన్నాయి.. నిజామాబాద్ జిల్లా వర్ని పోలీస్ స్టేషన్ పరిధిలోని శ్యాం రావు తండాలో మాలోత్ దుప్యా(58) అనే వ్యక్తి కన్న కొడుకు చేతిలో హత్యకు గురయ్యాడని రుద్రూర్ సీఐ అశోక్ రెడ్డి పేర్కొన్నారు.

మృతుని కుమారుడు వినోద్ తన భార్యతో గొడవ పడుతుండగా ఆపడానికి వెళ్లిన తండ్రిని కర్రతో తలపై, ఛాతి పై బలంగా కొట్టడంతో తీవ్రగాయలపాలై అక్కడికక్కడే మృతిచెందాడని సీఐ తెలిపారు. నిందితుడు తాగుడికి బానిసై రోజు భార్య, తండ్రితో గొడవపడే వాడని, గతంలో వినోద్ దొంగతనం కేసులో జైలు శిక్ష అనుభవించాడన్నారు. నిందితుడు పరారీలో ఉన్నాడని, మృతుని అన్న గోపాల్ ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఆయన తెలిపారు. శవ పంచనామా చేసి పోస్టు మార్టం నిమిత్తం బాన్సువాడ ఏరియా ఆసుపత్రికి మృతదేహాన్ని తరలించినట్లు ఆయన అన్నారు. సీఐ వెంట వర్ని ఎస్ఐ అనిల్ రెడ్డి ఉన్నారు.