తిరుమలాయపాలెంలో బైకును ఢీకొట్టిన లారీ.. చికిత్స పొందుతూ వ్యక్తి మృతి

దిశ, తిరుమలాయపాలెం: బంధువుల ఇంటికి వచ్చి తిరిగి వెళ్తుండగా రోడ్డు ప్రమాదానికి గురైన వ్యక్తి మృతి చెందిన సంఘటన సోమవారం తెల్లవారుజామున మండలంలో చోటుచేసుకుంది. పోలీసులు తెలిపిన వివరాల మేరకు.. మండలంలోని పిండిప్రోలు గ్రామపంచాయతీ పరిధిలో పాపాయిగూడెం గ్రామానికి చెందిన గుంటి వీరభద్రం(55) ఆదివారం తిరుమలాయపాలెం గ్రామంలో ఉన్న బంధువులు నిర్వహించిన కార్యానికి హాజరయ్యారు. తిరిగి తన స్వగ్రామమైన పాపాయిగూడెం వెళ్తుండగా తిరుమలాయపాలెం పెట్రోల్ బంక్ వద్ద, ఖమ్మం నుంచి మరిపెడ బంగ్లా వైపు వెళుతున్న రాజస్థాన్ లారీ వీరభద్రం ద్విచక్ర వాహనాన్ని వెనకనుంచి ఢీ కొట్టింది.

ఈ ప్రమాదంలో వీరభద్రం తలకు బలమైన గాయం కావడంతో తీవ్ర రక్తస్రావం అయ్యింది. దీంతో 108 అంబులెన్స్ ద్వారా ఖమ్మం ఆస్పత్రికి మెరుగైన చికిత్స కోసం హైదరాబాదులోనే ఓ కార్పొరేట్ ఆస్పత్రిలో చేర్పించగా చికిత్స పొందుతూ సోమవారం తెల్లవారుజామున మరణించినట్లు తెలిపారు. మృతునికి భార్య కూతురు ఉన్నారు. అందరితో కలివిడిగా ఉండే వీరభద్రం మరణ వార్త తెలియడంతో ఆ గ్రామంలో విషాదఛాయలు అలుముకున్నాయి. మృతుని అన్న, కుమారుడు ఉపేంద్ర ఇచ్చిన ఫిర్యాదు మేరకు కేసు నమోదు దర్యాప్తు చేస్తున్నట్లు తెలిపారు.