ప్రతి కార్యకర్తను కడుపులో పెట్టుకుంటా: రేవంత్ రెడ్డి

దిశ, డైనమిక్ బ్యూరో: తెలంగాణ అసెంబ్లీ ఎన్నికల ఫలితాల్లో కాంగ్రెస్ పార్టీ విజయభేరి మోగిస్తున్నది. అనేక స్థానాల్లో కాంగ్రెస్ అభ్యర్థులు గెలిచారు. ప్రస్తుతం కౌంటింగ్ ప్రక్రియ కొనసాగుతోంది. అందులో కాంగ్రెస్ పార్టీ లీడ్‌లో కొనసాగుతోంది. ఈ నేపథ్యంలోనే టీపీసీసీ చీఫ్ రేవంత్ రెడ్డి సోషల్ మీడియా వేదికగా కాంగ్రెస్ కార్యకర్తలను ఉద్దేశించి ఎమోషనల్ ట్వీట్ చేశారు. ‘నిన్న, నేడు, రేపు మీరే నా బలం.. తెలంగాణ రక్షణ కై కదిలిన కాంగ్రెస్ దళం’ అంటూ పేర్కొన్నారు.

మరో ట్వీట్ చేస్తూ.. ఆత్మగౌరవ జెండాను ఆకాశమంత ఎత్తున ఎగరేసిన కొడంగల్ గడ్డకు శిరస్సు వంచి నమస్కరిస్తున్నానని తెలిపారు. ‘కొన ఊపిరి వరకు కొడంగలే శ్వాసగా జీవిస్తా. కష్టకాలంలో భుజాలు కాయలు కాసేలా కాంగ్రెస్ జెండాను మోసిన ప్రతి కార్యకర్తను కడుపులో పెట్టుకుని చూసుకుంటా. ఈ గడ్డ పై ప్రతి బిడ్డ బతుకులో వెలుగు నింపే బాధ్యత తీసుకుంటా. దేశానికి కొడంగల్ ను ఒక మోడల్ గా నిలబెడతా’ అని ఎమోషనల్ ట్వీట్ చేశారు.