పాలకుర్తిలో ఎలుగుబంటి హల్ చల్... రైతుపై దాడి

దిశ పాలకుర్తి/తొర్రూరు:- ఓ రైతు తన పొలం వద్దకు వ్యవసాయ పనుల నిమిత్తం వెళ్తున్న సమయంలో ఎలుగుబంటి దాడి చేయగా రైతుకు తీవ్ర గాయాలైన సంఘటన జనగామ జిల్లా పాలకుర్తి మండలం లో చోటుచేసుకుంది. స్థానికులు తెలిపిన వివరాల ప్రకారం..పాలకుర్తి మండలం అయ్యగారిపల్లి గ్రామ శివారు రేగులగడ్డకు చెందిన రైతు ముస్కు నారాయణ ఆదివారం తెల్లవారు జామున తన వ్యవసాయ పొలం వద్దకు వెళ్తున్న సమయంలో ఎలుగు బంటి ఒక్కసారిగా దాడి చేసింది. తలపై భాగంలో తీవ్రంగా గాయాలై ప్రాణాపాయ స్థితిలో ఉండడంతో,వెంటనే స్థానికుల సహాయంతో వరంగల్ ఎంజీఎం ఆస్పత్రికి తరలించి చికిత్స అందిస్తున్నారు. ఎలుగుబంటి చుట్టుపక్కల గ్రామాల పరిసరాల్లో గత కొద్ది రోజులుగా తిరుగుతుండడంతో రైతులు భయాందోళనకు గురవుతున్నారు. అదేవిధంగా ఫారెస్ట్ అధికారులు వెంటనే స్పందించి ఎలుగుబంటిని అదుపులోకి తీసుకొని ప్రజలు భయభ్రాంతులకు గురికాకుండా చూడాలని స్థానికులు కోరుతున్నారు.