ఐదుగురిని కరిచిన పిచ్చికుక్క.. చిన్నారులకు గాయాలు..!

దిశ, యాచారంః ఓ పిచ్చికుక్క స్వైర విహారంతో ప్రజలు భయంతో వణికిపోతున్నారు. పిచ్చికుక్క ముగ్గురు చిన్నారులు, ఓ వికలాంగుడిని వెంబడించి తీవ్రంగా గాయపరిచింది. ఓ గృహిణి కి స్వల్ప గాయాలు అయ్యాయి. పిచ్చికుక్క దాడిలో ఐదుగురు గాయపడడంతో యాచారం మండల కేంద్రంలో శనివారం ఉదయం ఈ ఘటన సంచలనం సృష్టించింది. స్థానికులు కర్రతో పిచ్చికుక్కని వెంబడించడంతో అది తప్పించుకోవడంతో ఇంకా ఎంత మందిని గాయం చేస్తుందని ఆందోళన చెందుతున్నారు. మండల కేంద్రంలోని ఎల్లమ్మ గుడి కాలనీలో నివసించే లోకేష్, ఎంజి లీనా, లడ్డు, ముగ్గురు చిన్నారులను చేతులకు కాళ్లకు పిచ్చికుక్క తీవ్ర గాయాలు చేసింది. మేడిపల్లి గ్రామానికి చెందిన వికలాంగుడైన నరసింహచారిని వెంబడించి పిచ్చికుక్క దాడి చేయడంతో తీవ్రంగా గాయపడ్డాడు. ఇంటి ముందు కల్లాపి చల్లుతున్న స్వాతి అనే మహిళలను స్వల్పంగా గాయం చేసింది. వీరందరినీ ప్రభుత్వ ఆసుపత్రికి తరలించగా వైద్యులు లేరని కిందిస్థాయి సిబ్బంది నామమాత్రపు సేవలు అందించారని ఆందోళన వ్యక్తం చేస్తున్నారు. 24 వైద్యులు అందుబాటులో ఉండి వైద్య సేవలు అందించాలని కోరుతున్నారు.