ముగ్గురు అనాథ పిల్లలను దత్తత తీసుకున్న ప్రధానోపాధ్యాయురాలు..
దిశ, సంగారెడ్డి అర్బన్ : ఆర్థిక స్తోమత సరిగా లేక కన్న పిల్లలను కొంతమంది తల్లిదండ్రులు దూరం చేసుకుంటున్న ఘటనలను మనం చూశాం. కానీ నిరుపేద కుటుంబానికి చెందిన అనాధ పిల్లలను ఓ ప్రధానోపాధ్యాయురాలు తన అక్కున చేర్చుకుంది. పిల్లల విద్యాభ్యాసం మొత్తం ఖర్చులు తానే భరిస్తానంటూ ఆ ముగ్గురుని దత్తత తీసుకుంది. సంగారెడ్డి జిల్లా కంది లక్ష్మీ నగర్ లోని ప్రాథమిక పాఠశాలలో చదువుకుంటున్న సాయితేజ, తేజ, విజ్ఞేశ్వేర్ చాలా పేద వాళ్ళు.
వారి ఆర్థిక పరిస్థితిని అర్థం చేసుకుని పాఠశాల ప్రధానోపాధ్యాయులు లీలావతి ఆ ముగ్గురు పిల్లలను ప్రాథమిక విద్యాభ్యాసం పూర్తయ్యే వరకు దత్తత తీసుకున్నారు. వాళ్ళ విద్యాభ్యాసం పూర్తయ్యే వరకు మొత్తం ఖర్చులు భరిస్తానని ఈ సందర్భంగా లీలావతి హామీ ఇచ్చారు. ఈ సందర్భంగా టీపీటీఎఫ్ జిల్లా అధ్యక్షులు సోమ శేఖర్, రాష్ట్ర కౌన్సిలర్ కమ్రొద్దిన్, మండల అధ్యక్షులు సిద్దేశ్వర్, పాఠశాల ఉపాధ్యాయులు ప్రమీల, చంద్రమోహన్ లు పిల్లలను అక్కున చేర్చుకున్న లీలావతిని అభినందించారు. ఆమె సామాజిక బాధ్యత అందరికీ ఆదర్శనీయమని వారు కొనియాడారు.
