survey : ఇంటింటి సర్వేతో కులగణన..

దిశ, రంగారెడ్డి బ్యూరో : తెలంగాణ రాష్ట్ర ప్రభుత్వం ప్రతిష్టాత్మకంగా చేపట్టనున్న ఇంటింటి సర్వేకు జిల్లాల అధికారులు ఏర్పాట్లు పూర్తి చేశారు. ఈ ఇంటింటి సర్వేలో ప్రతి ఒక్కరు పాల్గొనాలని రాష్ట్ర ప్రభుత్వం పిలుపునిచ్చింది. కాంగ్రెస్​ పార్టీ ఎన్నికల్లో ఇచ్చిన హామీల్లో భాగంగా ఇంటింటి సర్వేతో కులగణన పూర్తి చేయనున్నది. అయితే 2011 జనాభా లెక్కలకు అనుగుణంగానే రూట్​ మ్యాప్​ను రాష్ట్ర ప్రభుత్వం సిద్ధం చేసుకుంది. అందుకు అనుగుణంగానే సిబ్బందిని, అధికారులను నియమించింది. ఈ నెల 6 నుంచి 18వ తేదీ వరకు ఈ ప్రక్రియ కొనసాగనున్నది. 6, 7, 8వ తేదీ వరకు ఇంటింటికీ స్టిక్కర్​.. ఆ తర్వాత తొమ్మిది రోజులు ప్రభుత్వం రూపొదించిన 74 ప్రశ్నలకు సమాధానం సేకరించి సంబంధిత అధికారికి రిపోర్ట్​ చేయాల్సి ఉంటుంది.

ప్రైమరీ స్కూల్స్​ మూసివేయాల్సిందే..

రాష్ట్ర ప్రభుత్వం చేపట్టే కులగణనల్లో ప్రైమరీ స్కూల్స్​లో పనిచేసే ఎస్జీటీలు పాల్గొనాలని సూచించింది. అయితే రంగారెడ్డిలోని 886, వికారాబాద్​లోని 722 స్కూల్స్​ ఒక్కపూట నడిపించాలని రాష్ట్ర ప్రభుత్వం అధికారిక ఉత్తర్వులు జారీ చేశారు. రంగారెడ్డిలోని 21 56, వికారాబాద్​లోని 1791 మంది ఎస్జీటీ టీచర్లు సర్వేలో పాల్గొననున్నడంతో స్కూల్​ మూసివేసే పరిస్థితి వచ్చింది. దీంతో విధుల్లో పాల్గొనే టీచర్లు 12 రోజుల పాటు మధ్యాహ్నం పూర్తిగా స్కూల్స్​ బంద్​ చేయడంతో స్థానికుల్లో వ్యతిరేక భావన కలిగే అవకాశం ఉందని ఆందోళన చెందుతున్నారు. పూర్తి స్థాయిలో ప్రభుత్వం నిర్వహించిన సర్వేలో ప్రైమరీ స్థాయిలో విద్యను బోధించే టీచర్లు విధుల్లో పాల్గొనడం, ప్రభుత్వ ఆదేశాలతో సర్వేలో పాల్గొంటే స్కూల్స్​ మూతపడే అవకాశం ఉందనే ఆరోపణలు వినిపిస్తున్నాయి.

ఒక ఎన్యూమరేటర్‌కు 150కి పైగా ఇండ్లు..

రంగారెడ్డి జిల్లాలోని 21 మండలాల్లో 13 మున్సిపాలిటీలు, 3 కార్పొరేషన్లు, 549 గ్రామ పంచాయతీలు, వికారాబాద్​ జిల్లాలోని 18 మండలాల్లో 4 మున్సిపాలిటీలు, 560 గ్రామ పంచాయతీలున్నాయి. ఈ జిల్లాల్లోని ప్రతి ఇంటిలోని కుటుంబం సర్వే చేసేందుకు ప్రభుత్వం ఏర్పాట్లు చేసింది. అయితే 150 నుంచి 175 ఇండ్ల వరకు ఒక ఎన్యూమరేటర్​ను నియమిస్తూ సర్వే చేయనున్నారు. బుధవారం నుంచి ఈ నెల 18వ తేదీ వరకు ఈ సర్వే నడవనుంది. ప్రతి కుటుంబ యజమానిని నేరుగా ఎన్యుమరేటర్​ కలిసి వివరాలు సేకరించాలని ఉన్నతాధికారులు ఆదేశాలు జారీ చేశారు. సేకరించిన సమాచారం మొత్తం ఈ నెల చివరి నాటికి కంప్యూటర్​లో అప్లోడ్​ చేయాలని మండల అభివృద్ధి అధికారులు అప్పగించారు.