ట్రాక్టర్ డ్రైవర్‌ను కొట్టి డబ్బుల దొంగతనం.. ఇద్దరు వ్యక్తులు అరెస్ట్
దిశ, నేరేడుచర్ల: ట్రాక్టర్‌ను వెంటాడి డ్రైవర్‌ను కొట్టి డబ్బులు దొంగలించిన ఇద్దరు నిందితులను అరెస్ట్ చేసినట్లు హుజూర్ నగర్ సీఐ చరమంద రాజు మంగళవారం తెలిపారు. ఈ కేసు‌కు సంబంధించిన వివరాలను నేరేడుచర్ల పోలీస్ స్టేషన్లో ఏర్పాటు చేసిన మీడియా సమావేశంలో వెల్లడించారు. వివరాల ప్రకారం ఇలా ఉన్నాయి.. నల్లగొండ జిల్లా మాడుగుల పల్లి మండలం అబంగాపురం గ్రామానికి చెందిన షేక్ సోహెల్ గత నెల 31న ట్రాక్టర్పై నేరేడుచర్ల మీదుగా పెన్‌పహాడ్ మండలంలోని అనాజిపురం గ్రామానికి వెళ్తున్నాడు. ఆ సమయంలో పెంచికల్ దిన్న గ్రామానికి చెందిన సిద్ధ పంగ నరేష్, పత్తేపురం గ్రామానికి చెందిన సిద్ధపంగు అజయ్ కుమార్ కారుతో ట్రాక్టర్‌ను అడ్డగించి అతినిపై దాడి చేసి సెల్ ఫోన్ పగలగొట్టి అతని వద్ద ఉన్న రూ.20వేల డబ్బులు దొంగలించుకొని పోయినట్లు తెలిపారు. మంగళవారం పెంచికల్ దిన్నకు వచ్చి నేరానికి ఉపయోగించిన కారును దాచిపెట్టి కల్లూరు గ్రామ శివారులో ఉన్నట్లు వచ్చిన సమాచారం మేరకు వీరిని అరెస్ట్ చేసినట్లు తెలిపారు. దొంగలించిన డబ్బులో జల్సాలకు రూ. 11 వేలు ఖర్చు పెట్టగా వారి వద్ద ఉన్న రూ. 9 వేల నగదు, కారును స్వాధీనం చేసుకున్నట్లు వెల్లడించారు. ఆ ఇద్దరి పై కేసు నమోదు చేసి రిమాండ్‌కు పంపినట్లు తెలిపారు. సమావేశంలో ఎస్సై రవీంద్ర నాయక్, పోలీస్ సిబ్బంది ఉన్నారు.
