MLA : చెరువులపై మంత్రి భట్టి తెలిపిన లెక్కలు తప్పుల తడక
దిశ, కూకట్పల్లి : హైదరాబాద్ నగరంలో చెరువులు కబ్జాకు గురయ్యాయని తెలంగాణ ఆర్థిక శాఖ మంత్రి భట్టి విక్రమార్క (MLA Madhavaram Krishna Rao)ఇటీవల నిర్వహించిన ప్రెస్ మీట్లో చెప్పిన లెక్కలన్నీ తప్పుల తడక అని ఎమ్మెల్యే మాధవరం కృష్ణారావు ఆరోపించారు. మంగళవారం ఎమ్మెల్యే క్యాంప్ కార్యాలయంలో నిర్వహించిన సమావేశంలో ఆయన మాట్లాడుతూ గత కొంత కాలంగా కాంగ్రెస్ ప్రభుత్వం హైదరాబాద్ ప్రజలను హైడ్రా (Hydra)పేరుతో భయభ్రాంతులకు గురి చేస్తుందని, గత కొన్ని రోజుల క్రితం రాష్ట్ర ఆర్థిక శాఖ మంత్రి భట్టి విక్రమార్క నగరంలోని అన్ని చెరువుల వివరాలు ప్రకటిస్తూ వాటిని నెట్లో పొందు పరిచారన్నారు. ఆర్థిక శాఖ మంత్రి తెలిపిన వివరాలు అన్నీ తప్పుల తడక అని ఆరోపించారు.
కూకట్పల్లి నియోజకవర్గంలో ఉన్న బోయిన్ చెరువు, ఖాజాకుంట చెరువు, నల్ల చెరువు, మైసమ్మ చెరువు, కాముని చెరువు, ముళ్లకత్వ చెరువు, సున్నం చెరువు, రంగధాముని చెరువుల పూర్వి వివరాల గురించి ఆర్టీఐ ప్రకారం అధికారులను సమాచారం అడిగినట్టు తెలిపారు. వారు ఆర్టీఐ ద్వారా ఇచ్చిన సమాచారం ఆర్థిక శాఖ మంత్రి భట్టి విక్రమార్క ప్రెస్ మీట్లో ఇచ్చిన వివరాలకు పొంతన లేదని అన్నారు. సీనియర్ నాయకులు, మంత్రి హోదాలో ఉన్న భట్టి విక్రమార్క అధికారులను సంప్రదించి వారి నుంచి పూర్తి సమాచారం తీసుకుని ప్రెస్ మీట్ పెట్టాలి కానీ తప్పుల తడకగా ఉన్న వివరాలను బయట పెట్టి ప్రజలను భయపెట్టడం సమంజసం కాదని అన్నారు.
అసలు రెవెన్యూ శాఖ మంత్రికి సంబంధించిన సబ్జెక్ట్ను ఆర్థిక శాఖ మంత్రి వివరించడం ఏంటో వారికే తెలియాలని విమర్శించారు. గతంలో కాంగ్రెస్ ప్రభుత్వ హయాంలోనే చెరువులు కబ్జాకు గురయ్యాయని, కాలనీలు ఏర్పడ్డాయని తెలిపారు. అప్పటి నుంచి ఇప్పటి వరకు చెరువుల వద్ద అదే పరిస్థితి ఉందని అన్నారు. చెరువుల వద్ద హైడ్రా పేరుతో జరిపిన కూల్చి వేతలు ఎఫ్టీఎల్లో నిర్మించుకున్నవి కావని, బఫర్ జోన్లో నిర్మించుకున్న వాటిని కూల్చి ప్రజలను భయ పెడుతున్నారని అన్నారు.
ఆకాశంలో, గూగుల్ ద్వారా కాకుండా భూమి మీద సర్వేలు నిర్వహిస్తే నిజానిజాలు బయట పడతాయని సూచించారు. ఆర్టీఐ ద్వారా కూకట్పల్లి చెరువులకు సంబంధించి సేకరించిన వివరాలను అసెంబ్లి స్పీకర్, ప్రభుత్వానికి అందజేస్తానని అన్నారు. కూకట్పల్లి నియోజకవర్గంలో ఉన్న చెరువుల వద్ద ప్రజలను భయపెట్టడం కాకుండా అభివృద్ధి చేయాలని, చెరువులో పట్టా భూములు ఉన్న వారికి నష్టపరిహారం చెల్లించి, ఆ భూములను స్వాధీనం చేసుకుని అభివృద్ధి చేయాలని కోరారు.
