7వ రౌండ్‌లో ప్రజ్ఞానంద, విదిత్‌కు డ్రా
దిశ, స్పోర్ట్స్ : కెనడాలో జరుగుతున్న క్యాండిడేట్స్ చెస్ టోర్నీలో శుక్రవారం భారత గ్రాండ్‌మాస్టర్లకు నిరాశ ఎదురైంది. 7వ రౌండ్‌లో ఎవరు విజయం సాధించలేకపోయారు. పురుషుల విభాగంలో ప్రజ్ఞానంద ఇటలీ ప్లేయర్ ఫాబియానో కరువానాతో పాయింట్లు పంచుకున్నాడు. విదిత్ కూడా అజర్‌బైజాన్ గ్రాండ్‌మాస్టర్ నిజత్ అబాసోవ్‌తో 51 ఎత్తుల్లో 7వ రౌండ్‌ను డ్రాగా ముగించాడు. మరో భారత క్రీడాకారుడు గుకేశ్ టోర్నీలో తొలి ఓటమి పొందాడు. ఫ్రాన్స్ ప్లేయర్ అలిరెజా ఫిర్హౌజ్జా చేతిలో 40 ఎత్తుల్లో గేమ్‌ను కోల్పోయాడు. ఏడు రౌండ్లు ముగిసే సరికి పాయింట్స్ టేబుల్‌లో గుకేశ్, ప్రజ్ఞానంద చెరో 4.0 పాయింట్లతో రెండో స్థానాన్ని పంచుకోగా.. విదిత్ సంతోశ్(3.5) మూడో స్థానంలో ఉన్నాడు. మహిళల విభాగంలో భారత అగ్రశ్రేణి క్రీడాకారిణి కోనేరు హంపి టోర్నీలో ఐదో డ్రా చేసుకుంది. అన్నా ముజిచిక్(ఉక్రెయిన్)తో కలిసి 40 ఎత్తుల్లో పాయింట్లు పంచుకుంది. ఆర్.వైశాలి వరుసగా రెండో ఓటమిని పొందింది. చైనా క్రీడాకారిణి లీ టింగ్జీ చేతిలో 36 ఎత్తుల్లో ఓటమిని అంగీకరించింది. కోనేరు హంపి, వైశాలి చెరో 2.5 పాయింట్లతో ఐదో స్థానంలో ఉన్నారు.
