‘పొచ్చెర’ జలపాతాన్ని కమ్మేసిన పెద్దవాగు..
దిశ ప్రతినిధి, ఆదిలాబాద్ : ఉమ్మడి ఆదిలాబాద్ జిల్లాలోని జలపాతాలు జలకళను సంతరించుకున్నాయి. ఆదిలాబాద్, ఆసిఫాబాద్, నిర్మల్ జిల్లాల్లోని పొచ్చెర, కుంటాల, కొరిటికల్, కనకాయి, మిట్టె, వాస్తాపూర్, సమతలగుండం, చింతల మాదరి వంటి జలపాతాలు ఉధృతంగా జాలువారుతున్నాయి. ప్రస్తుతం మహారాష్ట్రతో పాటు ఉమ్మడి ఆదిలాబాద్ జిల్లాలో భారీ వర్షాలు కురుస్తుండటంతో అన్ని జలపాతాలు మాములుగా సందడి చేయడం లేదు. గతంలో ఎన్నడూ లేని విధంగా జలపాతాలు పొంగి పారుతున్నాయి. ఆదిలాబాద్ జిల్లా బోథ్ మండలం పొచ్చెర జలపాతం కనిపించకుండా పెద్దవాగు ప్రవహిస్తోంది. ఇది చాలా అరుదుగా కనిపించే దృశ్యం.
కానీ, ఈ ఏడాది ఆ దృశ్యం కనిపిస్తోంది. దీనిని బట్టి బోథ్ మండలంలో కురుస్తున్న వర్షం ఏ రేంజ్‌లో ఉందో అర్థం చేసుకోవచ్చు. బోథ్‌లో గత 24 గంటల్లో నమోదైన వర్షపాతం అక్షరాల 211మిల్లీ మీటర్లు. భారీ వర్షాల ధాటికి జిల్లాలోని అన్ని జలపాతాల వద్ద పెనుప్రమాదం పొంచి ఉంది. ఈ నేపథ్యంలో జలపాతాల వద్దకు సందర్శకులకు అనుమతి నిరాకరిస్తున్నారు.
