Bihar: దైవదర్శనానికి వెళ్తూ అనంతలోకాలకు.. విద్యుత్ వైర్లు తగిలి 8 మంది మృతి
దిశ, నేషనల్ బ్యూరో: బిహార్ లోని హాజీపూర్ జిల్లా సుల్తాన్ పూర్ లో ఘోరప్రమాదం జరిగింది. విద్యుదాఘాతంతో 8 మంది భక్తులు దుర్మరణం చెందారు. హరిహరనాథ్ ఆలయంలో పూజలు చేసేందుకు మినీ ట్రక్కుపై భక్తుల బృందం వెళ్తుండగా ఈ ఘటన జరిగింది. వారు ఆలయానికి వాహనంలో వెళ్తుండగా.. 11కేవీ హై టెన్షన్ వైరు తాకింది. దీంతో కరెంట్ షాక్ వల్ల ఎనిమిది మంది చనిపోయారు. మరికొందరికి గాయాలయ్యాయి. శ్రావణ మాసంలో స్థానిక యువకులు హరిహరనాథ్ ఆళయంలో ప్రత్యేక పూజలు చేస్తుంటారు. ఆ కార్యక్రమం కోసం వెళ్తుండగా ఈ ఘటన జరిగింది. ప్రమాదం గురించి సమాచారం అందుకున్న సబ్ డివిజనల్ మేజిస్ట్రేట్ (ఎస్డీఎం)తో పాటు పోలీసులు సంఘటనా స్థలానికి చేరుకున్నారు. స్పాట్ లో సహాయక చర్యలుచేపట్టారు. గాయపడిన వారిని ఆస్పత్రికి తరలించారు. ఈ ప్రమాదంపై స్థానికులు మండిపడుతున్నారు. విద్యుత్ శాఖ నిర్లక్ష్యం వల్లే దుర్ఘటన జరిగిందని ఆరోపిస్తున్నారు. పదేపదే కాల్స్ చేసినప్పటికీ వారు ఫోన్ కు సమాధానం ఇవ్వలేదన్నారు. తక్షణ చర్యలు తీసుకోకపోవడం వల్ల ఇంతమంది ప్రాణాలు కోల్పోయారని ఆవేదన వ్యక్తం చేశారు.
