చంద్రబాబు ప్రచారంలో కనిపించని కేశినేని నాని

దిశ వెబ్‌డెస్క్: బెజవాడ టీడీపీలో బయటపడ్డ వర్గ విబేధాలు ఇంకా సమసిపోలేదు. టీడీపీ అధినేత చంద్రబాబు బుజ్జగించినా.. నేతల మధ్య విబేధాలు ఇంకా కొనసాగుతూనే ఉన్నాయి. విజయవాడ ఎంపీ కేశినేని నాని కూతురు శ్వేతను మేయర్ అభ్యర్థిగా ప్రకటించడం బోండా ఉమ, బుద్ధా వెంకన్న వర్గానికి నచ్చలేదు. అప్పటి నుంచి బయపపడ్డ వర్గ విబేధాలు మరింత రచ్చకెక్కాయి. మీడియా వేదికగా తెలుగు తమ్ముళ్లు ఒకరిపై ఒకరు తీవ్ర విమర్శలు చేసుకోవడం బెజవాడ టీడీపీలో కాక రేపింది.

ఇవాళ విజయవాడలో చంద్రబాబు మున్సిపల్ ఎన్నికల ప్రచారం నిర్వహించగా.. ఈ ప్రచారంలో లోకల్ ఎంపీ కేశినేని నాని కనిపించకపోవడం గమనార్హం. లోకల్ ఎంపీ అయి ఉండి ప్రచారంలో పాల్గొనకపోవడంతో.. బెజవాడ టీడీపీలో నేతల విబేధాలు అలాగే ఉన్నట్లు అర్థమవుతోంది. కేశినేని నాని పాల్గొంటే.. తాము పాల్గొనబోమని ఎమ్మెల్సీ బుద్ధా వెంకన్న, మాజీ ఎమ్మెల్యే బోండా ఉమ నిన్న మీడియా వేదికగా చెప్పిన విషయం తెలిసిందే.

ఎన్నికల సమయంలో గొడవలు సరికాదని కేశినేని నాని వెనక్కి తగ్గినట్లు తెలుస్తోంది. అందుకే చంద్రబాబు ప్రచార కార్యక్రమంలో పాల్గొనలేదని తెలుగు తమ్ముళ్లలో చర్చ జరుగుతోంది. మరి చూడాలి బెజవాడ టీడీపీలో ఈ వర్గ విబేధాలను చంద్రబాబు ఎలా పరిష్కరిస్తారో?..