ఆ నిధులకు చట్టబద్ధత హర్షణీయం

ఆంధ్రప్రదేశ్ రాష్ట్ర ప్రభుత్వం ఎస్సీ, ఎస్టీ కంపోనెంట్ నిధుల వినియోగానికి చట్టబద్ధత పదేళ్ల పాటు కల్పిస్తూ ఆర్డినెన్స్ తీసుకురావడం హర్షణీయం. ఉప ప్రణాళిక నిధులకు 2013లో కల్పించిన చట్టబద్ధత ముగిసినందున అత్యవసర ప్రాతిపదికన ఈ ఆర్డినెన్స్ తీసుకురావడం ద్వారా చట్టం నిర్వీర్యం కాకుండా జాగ్రత్త పడినట్లయింది. శాసనసభ సమావేశాల్లో అందుకు తగిన చట్టాన్ని ప్రవేశపెట్టి, ఆమోదం పొందే వరకు ఈ ఆర్డినెన్స్ అమలులో ఉంటుంది. కేంద్రం బడ్జెట్ కేటాయింపుల్లో ప్రణాళిక, ఉపప్రణాళిక తరహా విభజనలకు మంగళం పాడినప్పటి నుండి వీటిని 'కంపోనెంట్' నిధులుగా వ్యవహరిస్తున్నారు.

అయితే వీటిని ఏ పేరుతో వ్యవహరించినా బలహీన వర్గాలకు జనాభా దామాషా పద్దతిలో కేటాయింపులు ఉండాలి. విడుదలైన నిధుల్ని దారి మళ్లించకుండా, మురిగిపోయి వెనక్కి పోయేలా కాకుండా ఈ చట్టబద్ధత కాపాడుతుంది. ఎస్సీ, ఎస్టీల సంక్షేమానికి, సమగ్ర అభివృద్ధికి, నిర్దేశించిన పథకాల ద్వారా ఖర్చుపెట్టేలా ప్రభుత్వాన్ని జవాబుదారీ చేస్తుంది. ఏ కారణంతో నైనా ఖర్చు కాని నిధులు తర్వాత సంవత్సరంలో కూడా అందుబాటులోకి వస్తాయి. ఆయా వర్గాల అభివృద్ధికి ఎంతో కీలకమైన ఈ చట్టం పదేళ్లు కొనసాగేలా నిర్ణయం తీసుకున్న రాష్ట్ర ప్రభుత్వానికి అభినందనలు. కేంద్రంలో కూడా ఎస్సీ, ఎస్టీ కాంపోనెంట్ నిధులకు ఈ తరహా చట్టబద్ధత కల్పించడం అవసరం.

డా. డి.వి.జి.శంకర్ రావు,

94408 36931