తిరిగొచ్చింది నేనే...!

ఊపిరిసల్పని ఒత్తిడిలో

ఉదయం నుంచి సాయంత్రం దాకా

గాయి గాయిగా ఊరంతా తిరిగాను

క్షణం తీరిక లేదు

కాలు నిలిచిందీ లేదు

కొత్తగా నేర్చుకున్నదీ లేదు

పాతది మర్చిపోయిందీ లేదు

రోడ్డూ చౌరాస్తా మార్కెట్టూ

జనం జాతర...

ఎన్నో ముఖాలు ఎన్నెన్నో రూపాలు

ఎన్నో వ్యవహారాలు ఎన్నెన్నో లావాదేవీలు

ఎవరి చట్రంలో వాళ్ళు గిరగిరా

ఎవరి లోకంలో వాళ్ళు బహుపరాక్

నన్నెవరూ గుర్తుపట్టలేదు

నేనెవర్నీ పలకరించలేదు

కాళ్లరిగేలా అటు తిరిగీ ఇటు తిరిగీ

అలసి సొలసి ఆగమాగమై

ఇల్లు చేరుకున్నా

ఆదుర్దాగా నన్ను నేను

అద్దంలో చూసుకున్నా

హమ్మయ్య తిరిగొచ్చింది నేనే

మరెవరో కాదు అని

గాఢంగా నిట్టూర్పు విడిచా

- వారాల ఆనంద్

94405 01281