2024 మార్గశిర అమావాస్య పూజా విధానం.. శుభ ముహుర్తాలివే..

దిశ, ఫీచర్స్ : జనవరి 11న గురువారం రోజున వచ్చే మార్గశిర అమావాస్యకు ఎంతో ప్రాధాన్యత ఉంది. మార్గశిర అమావాస్య రోజున ఉదయాన్నే నిద్రలేచి నదీ స్నానం చేసి సూర్య భగవానున్ని ప్రార్థించాలి. అనారోగ్య సమస్యలతో బాధపడేవారు ఈ రోజున పిండి దీపాలు, కుంభ దీపాలను వెలిగించాలి. అలాగే రావి చెట్టుకు దీపం వెలిగిస్తే మంచిదని పండితులు చెబుతున్నారు. అలాగే తమ పూర్వీకుల ఆత్మశాంతి కోసం తర్పణాలు వదలడం, శ్రాద్ధం కార్యక్రమాలు నిర్వహిస్తారు.

అంతే కాదు కాలసర్ప దోషం ఉన్నవారు ఈ రోజున ఉపవాస దీక్షను ఆచరిస్తే దోషం తొలగిపోతుందని చెబుతున్నారు. అలాగే ఈ రోజు ఉపవాసం ఉంటే పూర్వీకుల ఆత్మలతో పాటు బ్రహ్మదేవుడు, ఇంద్రుడు, సూర్యుడు, రుషి, పక్షులు, జంతువులు, అగ్ని, గాలి, ప్రేతాత్మలకు కూడా శాంతి లభిస్తుందని చెబుతున్నారు. అలాగే బ్రాహ్మణులకు అన్నదానం చేస్తే పూర్వీకుల ఆత్మకు శాంతి చేకూరుతుందని చెబుతున్నారు. జాతకంలో శని దోషం, పితృ దోషం ఉండే నువ్వులు, వంట సామాగ్రి, దుప్పట్లు దానం చేస్తే మంచిదట.

శుభ ముహూర్తం..

అమావాస్య తిథి ప్రారంభం : 10 జనవరి 2024, రాత్రి 10:25 గంటలకు

అమావాస్య తిథి ముగింపు : 11 జనవరి 2024, సాయంత్రం 5:27 గంటలకు