తీవ్ర విషాదం.. స్కూల్ బస్సు కింద పడి బాలుడి మృతి
దిశ, కొడకండ్ల : మండలం లోని చెరువు ముందు తండా గ్రామ పంచాయతీ పరిధిలోని రత్య తండాలో రెండు సంవత్సరాల బాలుడు బస్సు కింద పడి మృతి చెందాడు.ఈ ఘటన గురువారం చోటుచేసుకుంది. ఏఎస్సై కత్తి రమేష్ కథనం ప్రకారం సీఎం తండాలోని రత్య తండాకు చెందిన వాంకుడోత్ రమేష్ కుమారుడు శ్రీహాన్ (2) స్కూల్ బస్సు కిందపడి ప్రాణాలు కోల్పోయాడని తెలిపాడు. వాంకుడోత్ రమేష్ మహేశ్వరి ల కుమార్తె బాల యేసు పాఠశాలలో చదువుతోంది. గురువారం ఉదయం ఎనిమిది గంటలకు రమేష్ భార్య తన కుమార్తెను స్కూల్ బస్సు ఎక్కించడానికి తన కుమారుడు శ్రీహాన్‌తో కలిసి బస్సు వద్దకు వచ్చారు. కూతురిని బస్సు ఎక్కించి, ఆమెతో మాట్లాడుతున్న క్రమంలో శ్రీహాన్ ని తల్లి పక్కన నిలబెట్టుకున్నారు.
ఇంతలో తల్లి కూతురికి,బుక్స్, టిఫిన్ బాక్స్,అందిస్తున్న క్రమంలో శ్రీహన్ బస్సు టైర్ సమీపానికి చేరుకున్నాడు. డ్రైవర్ బస్సును కదలించగానే బాలుడు బస్సు కింద పడిపోయి మరణించాడు.బాలుడు గిలగిలమంటూ అరవడంతో డ్రైవర్ బస్సును ఆపి నప్పటికీ, అప్పటికే శ్రీహాన్ ప్రాణాలు కోల్పోయినట్లు తెలిసింది. ఈ దుర్ఘటనతో తండాలో విషాదఛాయలు అలుముకున్నాయి.ఇది స్కూల్ బస్సులపై జాగ్రత్తల గురించి తిరిగి ఆలోచింపజేస్తున్న ఘటనగా చోటు చేసుకుంది. ఈ సందర్భంగా మృతుడు శ్రీహన్ తల్లి మహేశ్వరి ఫిర్యాదు మేరకు కేసు నమోదు చేసుకుని దర్యాప్తు చేస్తున్నామని తెలిపారు.
