మద్యానికి డబ్బుల కోసం ద్విచక్ర వాహనాల చోరీ.. ఇద్దరు అరెస్ట్
దిశ, చార్మినార్ : పార్కింగ్ చేసిన ద్విచక్రవాహనాలను తస్కరించి తప్పించుకు తిరుగుతున్న ఇద్దరు పాతనేరస్థులను శాలిబండా పోలీసులు అదుపులోకి తీసుకుని శుక్రవారం రిమాండ్‌కు తరలించారు. శాలిబండా పోలీస్స్టేషన్‌లో శుక్రవారం రాత్రి ఏర్పాటు చేసిన మీడియా సమావేశంలో ఫలక్‌నుమా డివిజన్ ఏసీపీ షేక్ జహంగీర్, శాలిబండా ఇన్స్పెక్టర్ కిషన్, డిటెక్టివ్ ఇన్స్పెక్టర్ మునావర్ షరీఫ్‌లతో కలిసి వివరాలు వెల్లడించారు. శుక్రవారం మధ్యాహ్నం శాలిబండాలో డిటెక్టివ్ ఇన్స్పెక్టర్ మునవార్ షరీఫ్ , సబ్ ఇన్స్పెక్టర్ హసిన , వేణుగోపాల్ , వికాస్ క్రైం సిబ్బందితో కలిసి వాహనాలు తనిఖీలు చేస్తుండగా ఇద్దరు యువకులు అనుమానస్పదంగా వ్యవహరించడంతో పోలీసులు అదుపులోకి తీసుకుని విచారించారు.
బిలాల్నగర్కాలాపత్తర్‌కు చెందిన మొహమ్మద్ ఇమ్రాన్ ఖురేషి అలియాస్ ఇమ్రాన్ (40) వృత్తి రిత్యా ఆటోడ్రైవర్, ముస్తఫా నగర్‌కు చెందిన మొహమ్మద్ బాబా (52) లు మద్యం, కల్లుకు బానిసయ్యారు. మద్యానికి డబ్బులు లేకపోవడంతో పార్కింగ్చేసిన ద్విచక్ర వాహనాలను దొంగిలించి, సొమ్ము చేసుకుందామని పక్కా స్కెచ్ వేశారు. ఈ నేపధ్యంలోనే హైదరాబాద్ పరిసర ప్రాంతాలలో ఇప్పటి వరకు ఐదు దొంగతనాలకు పాల్పడినట్లు పోలీసుల విచారణలో అంగీకరించారు. వారి వద్ద నుంచి రూ. 2.10లక్షల విలువ చేసే 4 ద్విచక్రవాహనాలను పోలీసులు స్వాధీనం చేసుకుని మొహమ్మద్ఇమ్రాన్ ఖురేషి , మొహమ్మద్ బాబాలను శుక్రవారం రిమాండ్‌కు తరలించారు. ఈ కేసును శాలిబండా పోలీసులు దర్యాప్తు చేస్తున్నారు.
