ఢిల్లీలో మళ్లీ లాక్‌డౌన్.. సీఎం కేజ్రీవాల్ క్లారిటీ..!
దిశ, వెబ్‌డెస్క్ : దేశంలో కరోనా సెకెండ్ వేవ్ కొనసాగుతోంది. దీని తీవ్రత ఎక్కువగా ఉండటంతో దేశ రాజధాని ఢిల్లీలో కేసుల సంఖ్య క్రమంగా పెరుగుతోంది. గడచిన 24గంటల్లో 3,583 కొత్త కరోనా కేసులు నమోదైనట్లు సమాచారం. ఇక దేశవ్యాప్తంగా గడచిన 24గంటల్లో 72,330 కొవిడ్ కేసులు వెలుగుచూసినట్లు కేంద్ర వైద్యారోగ్యశాఖ ప్రకటించింది. దీంతో దేశంలోని మొత్తం కరోనా కేసుల సంఖ్య 1,22,21,665 చేరుకుంది. శుక్రవారం నమోదైన కేసుల్లో అధికంగా 39,544 దేశ ఆర్థిక రాజధాని మహారాష్ట్ర నుంచే ఉండటం గమనార్హం.
రాజధాని ఢిల్లీలో కరోనా కేసుల తీవ్రత ఎక్కువ అవడంతో ముఖ్యమంత్రి కేజ్రీవాల్ కీలక నిర్ణయం తీసుకున్నారు. 45ఏళ్ల వారికి ముందుగా కరోనా వ్యాక్సిన్స్ ఇవ్వాలన్నారు. ట్రేస్, టెస్ట్, ట్రీట్ అనే విధానాన్ని తాము ఫాలో అవుతున్నట్లు వివరించారు. కేసుల సంఖ్య పెరుగుతుండటంతో ఢిల్లీలో మరోసారి లాక్ డౌన్ విధిస్తారని ఊహాగానాలు జోరందుకున్నాయి. దీనిపై స్పందించిన కేజ్రీ.. ఎట్టిపరిస్థితుల్లోనూ లాక్‌డౌన్ పెట్టబోమని స్పష్టంచేశారు. ఈ నేపథ్యంలోనే గురువారం రోజున 71వేల మందికి కరోనా వ్యాక్సినేషన్ ఇచ్చినట్లు ముఖ్యమంత్రి కేజ్రీవాల్ ప్రకటించారు.
